ཐགས་མཁན་ཕོ་ཧྲེང་ལམ་འགྲོ་རྒྱུགས་པའི་སྟབས་ཀྱིས་སྟག་མི་ཟན་གྱི་ཁ་ནས་ཐར་ཏེ་དུག་སྦྲུལ་དང་ཝ་མི་ཟན་བཏུལ་ནས་རྒྱལ་ས་ཟིན་པ། རོ་སྒྲུང་།

492/545

 

དེར་རྒྱལ་བུས་རལ་གྲི་དེ་བཏོན་ནས་ཤིང་དེའི་རྩར་ཕྱིན། ཤིང་སྡོང་ཕྱེད་ཙམ་ཆོད་པ་བརྒྱབ། བླ་མ་ཀླུ་སྒྲུབ་སྙིང་པོ་ཡིན། ། ང་རང་རྒྱལ་བུ་བདེ་སྤྱོད་བཟང་པོ་ཡིན། ། དྲ་བ་ལྕགས་ཀྱི་མིག་དགུ་ཡིན། ། ཏོག་མ་སེང་ལྡེང་སྨུག་པོ་ཡིན། ། ཞགས་པ་འཕྲུལ་གྱི་ཨ་ལོང་ཡིན། ། རལ་གྲི་ངར་མ་རྡོ་ཆོད་ཡིན། ། མར་ཟན་ཟོས་པས་འཛད་མེད་ཡིན། ། རོ་ཁོག་བབ་བམ་ཤིང་སྡོང་གཅོད། ། བྱས་པས་རོ་དེ་བབས་བྱུང་སྟེ། རོ་དེའི་སྤྱི་བོ་ནས་རྐང་མཐིལ་ཡན་ཏོག་མས་བརྡུངས། ཁྱོད་ཁ་ཐམ་ཐམ་བྱ་རྒྱུ་གང་ཡོད་ཟེར་རལ་གྲི་བརྒྱབ། མིག་ཀྲབ་ཀྲབ་བྱ་རྒྱུ་གང་ཡོད་ཟེར་མིག་ལ་རལ་གྲི་བཙུགས། གཟུགས་གཞི་ཐམས་ཅད་ཕྲལ་ནས་དྲ་བའི་ནང་དུ་བརྫངས་དེ་ཁྱེར་ཡོང་བས་གོམ་པ་བདུན་བརྒྱད་ཙམ་སླེབས་པ་ན། རོའི་ཁ་ནས་རྒྱལ་བུ་རྒྱལ་བུ་ཟེར་བར། རྒྱལ་བུས་རྒྱུས་ཡོད་བསམ་ཁ་རོག་བསྡད་པས། རྒྱལ་བུ་ལས་ཟད་ཁྱོད་འདྲའི་ཁ་ནས་གཏམ་མི་ཐོན། ངས་སྒྲུང་ཞིག་བཤད་ཀྱི་ཉོན་ཨང་ཟེར། ལུང་པ་ཞིག་ན་རྒྱལ་པོ་ཞིག་ཡོད་ཅིང་། ལུང་པ་དེའི་ཕུ་ན་སྟག་མི་ཟན་ཞིག་ཡོད་པ་ཡིན་འདུག སྟག་མི་ཟན་ལ་ལུང་པ་དེ་ནས་ལོ་རེ་མི་གསུམ་གསུམ་སྤྲད་དགོས་ཀྱི་ཡོད་པར་འདུག ལུང་པ་དེའི་ཕུ་ན་ཐགས་མཁན་ཕོ་ཧྲེང་གཅིག་ཡོད་ཅིང་། མདའ་དེ་ན་ལས་ལ་བརྩོན་པའི་མ་བུ་གསུམ་ཡོད་འདུག་པས། མ་བུ་གསུམ་པོ་དེ་ལ་སྟག་གིས་ཟ་རེས་འཁོར། དེའི་དགོང་མོ་སྟག་དེ་ཁོང་མ་བུ་གསུམ་གྱི་ཁང་པའི་སྐས་ལ་འཛེགས་ནས་ཁུག་ཅིག་ཏུ་ཡིབས་བསྡད། ཨ་མ་དེའི་བསམ་པར་ང་ཟོས་ཀྱང་ལོ་ན་རྒས་པས་འགྱོད་པ་མེད། ཕྲུ་གུ་འདི་གཉིས་སྐྱོབ་ཐབས་ཅི་ཡོད་བསམ། དེར་ཁོང་མ་བུ་གསུམ་བཟའ་རྒྱུ་ཡོད་པ་ཟོས། བཏུང་རྒྱུ་ཡོད་པ་རྣམས་བཏུངས་ནས་སྡོད་པའི་སྐབས་དེར། ཨ་མ་ན་རེ། ང་ཚོ་གསུམ་དོ་ནུབ་སྟག་གིས་བཟའ་རྒྱུ་ཡིན་པས་ཕྲུ་གུ་གཉིས་སྟག་གིས་བཟའ་བར་སྐྲག་གི་མི་འདུག་གམ་བྱས་པར། བུ་དེ་ན་རེ། སྐྲག་རྒྱུ་གང་ཡོད། དོན་དམ་སྐྲག་དགོས་པའི་སེམས་ཅན་གཞན་ན་འདུག་བྱས་པར། ཨ་མ་ན་རེ། ཁོ་རེ་སྟག་ལས་ཀྱང་འཇིགས་པའི་སེམས་ཅན་གང་ན་འདུག་བྱས་པ་དང་། དེར་བུས་སྨྲས་པ། སྟག་ལས་འཇིགས་པའི་སེམས་ཅན་ཟོག་ཟེར་བ་ཆེན་པོ་ཞིག་འདུག ཟོག་ལས་ཀྱང་འཇིགས་པའི་སེམས་ཅན་སུ་རུ་ཁ་སྦུབ་ཟེར་བ་ཞིག་དང་། སུ་རུ་ཁ་སྦུབ་ལས་ཀྱང་འཇིགས་པའི་སེམས་ཅན་མདའ་ལེ་སྔོ་སྐྱ་ཟེར་བ་ཞིག་འདུག་བྱས་པ་དང་། སྟག་གི་བསམ་པ་ལ། ང་ལས་འཇིགས་པའི་སེམས་ཅན་ཟོག ཟོག་ལས་འཇིགས་པའི་སེམས་ཅན་སུ་རུ་ཁ་སྦུབ། སུ་རུ་ཁ་སྦུབ་ལས་འཇིགས་པའི་སེམས་ཅན་མདའ་ལེ་སྔོ་སྐྱ། གཞན་དེ་གཉིས་ལ་སྐྲག་དགོས་དོན་མེད་རུང་སུ་རུ་ཁ་སྦུབ་ཀྱི་ཁ་སྦུབ་ལུགས་དེ་རང་གི་ཐོག་ཏུ་མི་ཡོང་བའི་ངེས་པ་མེད་པས་དོ་ནུབ་ར་བའི་གླང་མ་གི་ཟོས་ནས་ཚོད་ལྟ་མ་བྱས་ན་གང་ཡོང་མི་ཤེས་བསམས། ར་བར་འཛུལ་ནས་གླང་རྒན་ཁྲ་བོ་གཅིག་ཡོད་པ་དེ་ཟོས་ནས་ཉལ་བསྡད་དོ། སྐབས་དེར་ལུང་པའི་ཕུའི་ཐགས་མཁན་ཁོའི་བསམ་པ་ལ་ཚེས་བཅོ་ལྔའི་ཟླ་བ་ཤར་ནས་གང་ཙམ་ཕྱིན་སོང་། སྟག་གིས་མི་ཟ་བ་རྣམས་སྲོད་ལ་ཟ་བ་ཡིན་པས། མོ་རང་མ་བུ་གསུམ་གྱི་གླང་དེ་བརྐུས་ནས་བཟའ་དགོས་བསམས། ལག་པ་གཡས་སུ་ཏོག་མ་ཞིག་ཁྱེར། གཡོན་དུ་ཞགས་པ་ཞིག་ཁུར་ནས་མ་བུ་གསུམ་གྱི་གླང་རྐུ་བར་ཕྱིན་པས་སྒོ་འགག་ཏུ་སླེབས་པ་དང་། མི་སྐད་ཁྱི་སྐད་གང་ཡང་མ་ཐོས་ཤིང་། ཚེས་བཅོ་ལྔའི་ཟླ་བ་གནམ་གྱི་གུང་དུ་སླེབས། སྟག་དེ་ནི་ར་བའི་མཐོངས་སུ་ཁྲ་འཁྱིལ་ལེར་ཉལ་བསྡད་ཡོད་པས། ཐགས་མཁན་ཕོ་ཧྲེང་པོའི་བསམ་པ་ལ་མི་སྐད་ཁྱི་སྐད་ནི་མི་འདུག འདི་ནི་གླང་ཁྲ་བོ་དེ་ཡིན་པ་ཐག་གིས་ཆོད་བསམ་པའི་དགའ་ཚོར་སྐྱེས་ཏེ་སྟག་དེ་ལ་བཞོན་པས། སྟག་གི་བསམ་པར་འདི་ནི་སུ་རུ་ཁ་སྦུབ་ཁོ་ཡིན་པ་འདྲ་བསམས་ཏེ་ཧར་ཏེ་ལངས་ནས་བྲོས་ཕྱིན། ཐགས་མཁན་གྱི་བསམ་པ་ལ་ད་ང་གང་དྲག་བསམ་སྟག་གི་རྣ་མཆོག་གཉིས་ནས་བཟུང་བས་ལ་ལུང་བཅོ་བརྒྱད་ཀྱི་བར་ཁྱེར་རོ། ལ་ལུང་མང་པོ་བརྒལ་ནས་ཉི་མ་རྩེ་ཤར་དུ་སླེབས་པ་དང་། ཤིང་ཙནྡན་གྱི་སྡོང་པོ་ཞིག་ལ་ཁྱུང་གི་ཚང་ཡོད་ཅིང་། ཚེས་བཅོ་ལྔའི་ནུབ་མོ་ཁྱུང་གི་སྒོ་ང་རྡོལ་རྒྱུ་ཡིན་པས་ཤིང་དེའི་རྩ་བ་ན་དུག་སྦྲུལ་ཆེན་པོ་ཞིག་ཡོད་པ་དེས་ཚེས་བཅོ་ལྔའི་སྔ་དྲོ་ཤིང་དེར་འཛེགས་ནས་ཁྱུང་ཕྲུག་ཚོ་བཟའ་རྒྱུ་ཡིན་འདུག ཐགས་མཁན་ཕོ་ཧྲེང་པོའི་བསམ་པ་ལ་ཤིང་སྡོང་ཕ་གི་ལ་ཞགས་པ་བརྒྱབ་ནས་བསྡད་དགོས་བསམ་ཞིང་། ཤིང་སྡོང་རྩར་སླེབས་པ་དང་ཞགས་པ་བསྐྱུར་བས་དུག་སྦྲུལ་གྱི་མཇུག་མ་ནས་ཟིན། དུག་སྦྲུལ་མར་བབས་ནས་སྟག་གི་སྙིང་ལ་བཅངས། དུག་སྦྲུལ་ཡང་སྟག་གིས་བསད། སྟག་དང་དུག་སྦྲུལ་གཉིས་ཀ་དེར་ཤི། དེར་ལུང་པའི་ཕྱུགས་རྫི་བ་མང་པོ་ཡོད་པས་དེ་རྣམས་ཀྱིས་ཁོ་སྔོན་དུ་སྟག་ལ་བཞོན་ནས་བྱུང་། བར་དུ་སྦྲུལ་ལ་ཞགས་པ་བརྒྱབ། སྟག་དང་དུག་སྦྲུལ་གཉིས་འཛིང་ཀ་བརྒྱབ་པ་མཐོང་བ་ཡིནའདུག ཕྱུགས་རྫི་རྣམས་བརྒྱུགས་ཕྱིན་ནས་ལུང་པའི་མདའི་རྒྱལ་པོར་ཞུས་པས། རྒྱལ་པོས་བློན་པོ་དྲག་པ་ཞིག་ཕྱུགས་རྫི་བ་དང་སྦྲགས་ནས་ཁོའི་རྩར་བཏང་། ཁོ་སྟག་གི་པགས་པ་བཤུ་བཞིནབསྡད་ཡོད་པས་བློན་པོས་ཁོ་རེ་ཁྱེད་སྐུ་ཁམས་བདེའམ། ཁྱེད་ངེད་ཀྱི་རྒྱལ་པོ་ཆེན་པོས་ཕེབས་གསུང་གི་འདུག་བྱས་པ་དང་། དེར་སྟག་གི་པགས་པ་བཤུས་ནས་རྒྱལ་པོའི་དྲུང་དུ་ཕྱིན་ནོ། རྒྱལ་པོའི་དྲུང་དུ་སླེབས་པ་དང་། རྒྱལ་པོས་རང་གི་སྲས་མོ་ཞིག་ཡོད་པ་དེ་ཁོ་ལ་གནང་། ཁོའི་མིང་ལ་ཚ་བོ་ངང་གི་སྟག་ཞོན་ཕྱག་ན་སྦྲུལ་ཞགས་བསྣམས་པ་ཞེས་མཚན་གསོལ། ནམ་ཞིག་ལུང་པ་དེའི་ཆང་ས་ཆེ་མོའི་འདུ་ཚོགས་ཤིག་ལ་ཁོ་གདན་དྲངས། ཆང་གིས་བཟི་ནས་ནང་དུ་ལོག་ཡོང་སྟེ་ལྷ་ལྕམ་ཉིད་རང་ངའི་མལ་བཟོས་ལ་ཁྱོད་ཀྱང་ཉོལ་སྡོད་ཟེར། ཁོའི་མལ་བཅོས་ཚར་བ་དང་ཁོས་རྩིབ་རྐྱོང་ཆེན་པོ་ཞིག་བྱས་ཏེ། ལྷ་ལྕམ། ང་ལུང་པའི་ཕུའི་ཐགས་མཁན་ཕོ་ཧྲེང་དེ་ཡིན། མ་མད་གསུམ་གྱི་གླང་ཁྲ་བོ་བརྐུ་བར་ཕྱིན་པས་སྟག་མི་ཟན་དང་ཐུག གླང་རེད་བསམ་དགའ་ནས་བཞོན་པས་སྟག་གིས་ལ་ལུང་མེད་པར་ཁྱེར། ཙནྡན་གྱི་ཡལ་ག་རེད་བསམས་ནས་ཞགས་པ་བསྐྱུར་བས་དུག་སྦྲུལ་གྱི་མཇུག་མ་ནས་ཟིན། དུག་སྦྲུལ་ཕྱིར་ལྡོག་སྟག་གི་སྙིང་ལ་བཅངས། སྟག་གིས་མ་བཟོད་དུག་སྦྲུལ་གྱི་མགོ་ནས་བཟུང་། སྟག་ལྤགས་བཤུ་བཞིན་སྡོད་སྐབས་བློན་པོ་གདན་འདྲེན་དུ་ཡོང་། རྒྱལ་པོའི་སྐུ་མདུན་དུ་ཕྱིན་པས་སྲས་མོ་ཁྱེད་ཉིད་གནང་། ལུང་པའི་ཕུ་ཡི་ཐགས་མཁན་ཕོ་ཧྲེང་ངར། ། ལྷ་ལྕམ་སྙིང་ནས་བརྩེ་མིན་མི་ཤེས་པས། ། ཐག་ཟན་ལག་པས་ཐེག་ཚད་ཟ་བ་ལ། ། ཁྱོད་ཉིད་ཨེ་དགའ་བདག་གིས་འདྲི་བར་ཞུ། ། བྱས་པ་དང་། ལྷ་ལྕམ་ཚིག་པ་ཟོས་ཏེ། རྒྱལ་པོའི་སྐུ་མདུན་དུ་ཕྱིན་ངུ་ཤགས་དང་སྦྲགས། ཡབ་རྒྱལ་པོ་ཁྱེད་ལ་བུ་མོ་ང་གཅིག་པོ་ལས་མེད་པར་སུ་ལ་གནང་ཡང་ཆོག་སྟེ། ཁོས་མ་གསང་དྲང་པོ་ཤོད་ལུགས་ལ་བལྟས་ན། ལུང་པའི་ཕུའི་ཐགས་མཁན་པོ་ཕོ་ཧྲེང་ཁོ་ཡིན་འདུག་ཞུས་པས། རྒྱལ་པོས། བུ་མོ་ཁྱོད་རང་བློ་ཀྱོག་མི་དགོས། ངོ་མ་ཡིན་མིན་ད་དུང་བལྟས་པས་ཆོག་གསུངས། བློན་པོ་རིག་པ་ཅན་ཞིག་ཡོད་པ་དེ་ལ་ཤོག་གསུངས་ནས་རང་རེའི་ལུང་པའི་ཕུ་ཡ་གི་ན། ཝ་མི་ཟན་ཞིག་ཡོད་པས་ལོ་རེར་མི་རེ་སྤྲད་དགོས་པ་དེ་ཚ་བོས་ཐུལ་ཤོག་ཟེར་བ་གྱིས། ལག་ཆ་གང་དགོས་ཁྱོད་ཀྱིས་དྲིས་ཤོག་གསུངས་པ་དང་། བློན་པོ་རིག་པ་ཅན་དེས་ཆང་དམ་འབི་གང་ཁུར་ནས་ཆང་འདྲེན་ཞིང་ཁོ་ལ་དྲིས་པར། རང་རེའི་ལུང་པའི་ཕུ་ན་ལོ་རེ་མི་རེ་སྤྲད་དགོས་པའི་ཝ་མི་ཟན་ཞིག་ཡོད་པ་དེ་འདུལ་བ་ལ། ལག་ཆ་གང་དགོས་ང་ལ་ཞལ་ཏ་སྐུར་དང་བྱས་པས། ཁོའི་བསམ་པ་ལ་ང་ནི་ལས་སུ་ཐགས་བཏགས། ལག་ཆ་ཐགས་ཁྲི་ལས་མེད་པས་གང་དྲག་བསམས་ནས་ཀ་གདུང་ལ་མིགས་ཧུར་ཧུར་ལྟ་བཞིན་ཁོའི་ཁ་ནས། ཀ་གཞུ་ལེགས་ཤིང་ཁྲུང་གཤོག་ལྡིང་བ་འདྲ། གདུང་མ་ཤོན་ཞིང་རིང་ལ་དུག་སྦྲུལ་རྒྱུགས་པ་འདྲ་བྱས་པ་དང་། ངས་གོ་ཟེར་བློན་པོ་དེ་ལོག་ཕྱིན། ཐགས་མཁན་ལ་ལན་འདེབས་རྒྱུ་མེད་པའི་སྐབས་དེར་སྙིང་ཡང་གྲང་བསང་བ་ཞིག་བྱུང་། བློན་པོ་དེ་རྒྱལ་པོའི་སྐུ་མདུན་དུ་ཕྱིན་ཏེ་ཚ་བོས་མདའ་ཀ་བ་ཙམ་ཞིག་དང་། གཞུ་གདུང་མ་ཙམ་ཞིག་དགོས་གསུང་གི་འདུག་ཞུས་པས། རྒྱལ་པོའི་ལྡུམ་ར་ནས་ལྕང་མ་གདུང་ཙམ་ཞིག་བཅད་ནས་གཞུ་བཟོས། ཀོ་ཐུབ་མང་པོ་སྒོར་དྲས་བྱས་ནས་རྒྱུད་བཟོས། ལྕང་མ་སྦོམ་ཞིང་ལྡེམ་པ་རྣམས་ལ་མདའ་བཟོས། མགར་བ་རྣམས་རུབས་ནས་ལྕགས་མང་པོ་མདེའུ་བཟོས་ཏེ་མདའ་གཞུ་རྣམས་མི་ལག་བྱས་ཏེ་བསྐྱལ་ལོ། སྐྱེལ་མཁན་རྣམས་ལོག་སོང་རྗེས་ཁོའི་བསམ་པ་ལ། ཝ་མོ་ཚང་ན་ཡོད་པས་ཟ་རུ་ཡོང་བ་ཐག་གིས་ཆོད་བསམས་ནས་ཉལ་བསྡད་དོ། ཝ་མོ་ཚང་ན་མེད་པར་ཕྱི་ནས་ལོག་འོང་བ་དང་། གཞུའི་རྒྱུད་མཐོང་སྟེ་ལྟོགས་སླ་ཆེ་བ་དང་། བསམ་པ་ངན་པས་གཞུ་རྒྱུད་དེ་བཅད་སྟབས་གཞུ་འཕར་ནས་ཝ་མོ་འི་སྣ་ལ་ཕོག་སྟེ་ཤིའོ། ཁོའི་བསམ་པ་ལ་ནང་ན་མོ་འདུག་པས་གང་དུ་ཕྱིན་པ་ཡིན་ནམ་བསམས་ནས་བལྟས་པས་ཝ་མོ་ཤི་ཡོད་པ་མཐོང་། དེ་མ་ཐག་ཁོ་ཝ་མོའི་རྩར་ཕྱིན་ཏེ་རོ་དྲུད་ཡོང་། རྩིབ་མ་དེ་གྲིས་དབྲལ་ནས་མདའ་དེ་བྱང་ཁོག་ཏུ་བརྫངས། ཁོས་རྒྱལ་པོའི་རྩར་ཕྱིན་ནས། ཝ་མི་ཟན་ངས་བསད་ཡོད་པས་ལེན་མཁན་གཏོང་བར་ཞུ་ཞུས་པས། གཡོག་མང་པོ་ཝའི་རོ་ལེན་དུ་བཏང་ངོ་། དེར་ཝའི་པགས་པ་བཤུས། མདའ་གཞུ་རྣམས་ཁུར་ནས་རྒྱལ་པོ་ལ་ཕུལ་ལོ། རྒྱལ་པོས་རང་གི་སྲས་མོ་དེ་བོས་ཤོག་གསུངས་ཤིང་། སྲས་མོ་སྐུ་མདུན་དུ་བཅར་བ་དང་། བུ་མོ་ཁྱོད་ཀྱིས་ཐགས་མཁན་ཕོ་ཧྲེང་ཁོ་ཡིན་ཟེར་ཞིང་། མ་སངས་ཀྱི་སྤྲུལ་པ་ཡིན་མིན་ཝ་ལྤགས་འདི་ལ་ལྟོས་གསུངས་པས། སྲས་མོ་དེ་ཡང་དགའ་ནས་ཁོ་རང་གཉིས་ལྷན་དུ་བསྡད་དོ། ཡང་དུས་ནམ་ཞིག་སོང་བ་དང་རྒྱལ་པོ་ལ་སྟོན་མོ་ཞུ་མཁན་བྱུང་བའི་དུས་ཁོ་ཆང་གིས་བཟི་སྟེ། ལུང་པའི་ཕུ་ཡི་ཐགས་མཁན་ཕོ་ཧྲེང་ཁོ་ང་ཡིན། ཝ་མོས་ཟ་བར་ཡོང་རྒྱུར་ཚང་དུ་ཉལ་ནས་བསྡད། ཝ་མོས་གཞུ་རྒྱུད་བཅད་ནས་སྣ་ལ་ཕོག་སྟེ་ཝ་མོ་ཤི་བ་ཡིན། ངས་ལྷ་ལྕམ་ཁྱེད་ཀྱི་ཁྱོ་བོ་ཨེ་ཉན་མི་ཤེས་པས། དེ་ལས་ལུང་པའི་ཕུའི་ཐགས་ཟན་ལག་པས་ཐེག་ཚད་ཟ་བར་འགྲོ་བ་ཨེ་དྲག་བྱས་པས། བུ་མོས་རྒྱལ་པོར་ཡབ་རྒྱལ་པོ་ལ་སྲས་མོ་བདག་གཅིག་པོ་ལས་མེད་པ་སུ་ལ་གནང་ཡང་ཆོག་པ་ལ། ཐགས་མཁན་ཕོ་ཧྲེང་འདི་ལ་གནང་བ་ཐབས་རེ་སྡུག་ཞུས་པས། ཡབ་ཀྱིས་བུ་མོར། འདི་ལ་མ་སངས་ཀྱི་རྣམ་སྤྲུལ་ཆེན་པོ་ཡོད་པ་ཡིན། བུ་མོ་ཁྱོད་ཀྱི་ཁྱོ་བོ་འདི་རང་གིས་ཆོག་པ་ཡོད། ཐགས་མཁན་ཕོ་ཧྲེང་ཁོ་ཡིན་མིན་བརྟག་པས་ཆོག དེང་སང་རང་རེ་ལ་ལུང་པ་གཞན་ནས་དམག་ཡོང་བ་འདུག་པས། དམག་དཔོན་ལ་ཚ་བོ་འབྱོན་དགོས་པ་འདུག ལག་ཆ་གང་དགོས་བློན་པོ་རིག་པ་ཅན་ཁྱོད་འདྲི་བར་རྒྱུགས་གསུངས་པ་དང་། བློན་པོ་རིག་པ་ཅན་དེས་ཆང་དམ་འབི་གང་ཁུར་ཏེ་ལྡུམ་ར་ཞིག་ཏུ་ཆང་དྲངས་ནས། དེང་སང་རང་རེའི་ཕྱོགས་སུ་དམག་ཡོང་བ་འདུག དམག་རློག་པའི་དམག་དཔོན་ལ་ཚ་བོ་ཁྱོད་འབྱོན་དགོས་པ་འདུག་པས། ལག་ཆ་གང་དགོས་ང་ལ་ཞལ་ཏ་གནང་བ་ཞུ་བྱས་པ་དང་། ལྡུམ་རའི་སྒོག་པ་མགོ་རྐང་གི་རྩ་བ་རྐོ་རན་པའི་མདུང་རྩེ་ཤར་བ་དེ་མཐོང་ནས་ཁོའི་བསམ་པ་ལ། ངས་ལས་སུ་ནི་ཐགས་བཏགས། ལག་ཆ་ལ་ཐགས་ཁྲི་ལས་མེད་བསམས་ཏེ་བློ་ལྡུམ་ར་ལ་རྒྱ་ཡན་པའི་ངང་། རྩ་བ་སྐྱ་བོ་ཁ་ཚ་བ། ། རྩེ་མོ་དུག་མདུང་རྩེ་གསུམ་པ། ། ད་དུང་མང་ལ་ཧྲག་པ་འདུག ། བྱས་པ་དང་། བློན་པོ་རིག་པ་ཅན་དེས་ངས་གོ་སོང་ཟེར་ནས་ལོག་ཕྱིན། རྒྱལ་པོ་ལ་བློན་པོས་ཞུས་པ། ཚ་བོ་ལ་འོག་རྟ་བྲ་བོ་ཁ་ཚ་ཅན་ཞིག་དགོས། ལག་ཏུ་དུག་མདུང་རྩེ་གསུམ་པ་ཞིག་དགོས། རྒྱབ་ཏུ་དཔུང་མང་ལ་ཧྲག་པ་ཞིག་དགོས། གནངས་ཉིན་དམག་འདེགས་ཟེར་བ་ཡིན་པར་འདུག་ཞུས་པ་དང་། ཁོ་རྟ་བྲ་བོ་ཁ་ཚ་ཅན་ཞིག་ལ་བསྐྱོན། ལུས་ལ་གོ་ཁྲབ་བཙན་པོ་ཞིག་གཡོགས། ལག་ཏུ་དུག་མདུང་རྩེ་གསུམ་པ་ཞིག་ཁྱེར། རྒྱལ་པོ་རང་གིས་འགོ་བྱས་པའི་དམག་དཔུང་རྣམས་ཀྱིས་རྒྱབ་དཔུང་བྱས་ཏེ་ཕ་རོལ་པོའི་དམག་གི་གདོང་ལ་ཕྱིན་ནོ། དེར་དགྲ་དམག་རྣམས་ཀྱི་བསམ་པ་ལ་ཁོང་ཚོ་ལ་ཚ་བོ་ངང་གི་སྟག་ཞོན་ཟེར་བའི་ཕོ་ངར་མ་ཞིག་ཡོད་པ་ཐོས་ནས་སྐྲག་གོ། ཕར་ཕྱོགས་ནས་ཀྱང་དམག་བཤམས། འདི་ཕྱོགས་ནས་ཀྱང་དམག་བཤམས། དམག་རུ་ཁ་གཏུགས་གྲབས་ཀྱི་མཚམས་སུ་ཁོའི་རྟ་དེ་ཁ་ཚ་ལངས་ཏེ་དགྲ་དམག་གི་དཀྱིལ་ལ་ཤོར་རོ། ཅི་དྲན་ཅི་མ་དྲན་ལ་ཁོའི་ཁ་ནས་ཕ་ང་གང་བྱེད་ཟེར་བ་ཞིག་ཤོར་བས། རྒྱལ་པོའི་སྙན་དུ་ཕོ་ང་བཞིན་གྱིས་ཤོག་ཟེར་བར་གོ་ནས། ཕོ་ང་བཞིན་གྱིས་ལ་རྒྱུགས་ཟེར་དམག་རྣམས་བརྫངས་སོ། ཁོས་རྟ་ཁ་འགོག་མ་ཐུབ་པར་ཕར་འགྲོ་ཚུར་འགྲོ་བྱས་པས། དུག་མདུང་ཕོག་ནས་མི་མང་པོ་ཤི། དགྲ་དམག་རྣམས་ཀྱི་སེམས་ལ་ཕོ་རྒོད་པ་ཡོད་ཟེར་བ་ཐོས་ལ་འདུག་ཀྱང་འདུག་ཟེར་འུར་ནས་བྲོས་ཕྱིན། དེར་དམག་ལས་རྒྱལ་ནས་ཡར་ལོག་སླེབས་པ་དང་། ཁོ་ལུང་པའི་ཕུའི་ཐགས་མཁན་ཕོ་ཧྲེང་ཁོ་ཡིན་པ་ཨེ་འདུག བུད་མེད་མིན་པས་མི་མི་ཕུང་། རྒོད་མ་ཡོ་ཡོ་མས་མིན་པ་མི་ཚོང་ཟེར་བ་བདེན་པར་འདུག་བྱས་སོ། ལྷ་ལྕམ་ཡང་དགའ། རྒྱལ་བློན་རྣམས་ཀྱང་དགའ་ནས་ཡིད་ཆེས་སོ། རྒྱལ་པོ་དེར་སྲས་མེད་པས་སྲས་མོ་དང་ཐགས་མཁན་ཕོ་ཧྲེང་གཉིས་པོར་རྒྱལ་སྲིད་གཏད། ལྷ་ལྕམ་དེ་ལ་སྲས་དང་སྲས་མོ་ལྔ་འཁྲུངས། རྒྱལ་སྲིད་ཀྱང་སྔར་ལས་དར་ཞིང་རྒྱས་པ་བྱུང་བ་ཡིན་པར་འདུག་བྱས་པ་དང་། རྒྱལ་བུའི་ཁ་ནས། མ་བུ་གསུམ་པོ་དེ་བསོད་ནམས་ཆེ། དེ་ལས་ཀྱང་ཐགས་མཁན་ཕོ་ཧྲེང་བསོད་ནམས་ཆེ་བ་བྱུང་འདུག་ཟེར་བ་ཤོར་བས་རོ་ལ་གཏམ་ཟེར་བྱ་ཁྲ་ཧུར་ཟེར། ལྡན་ལྕག་མེ་བུས་པ་འདྲ་བ་གསུམ་བརྒྱབ་ནས་རོ་དེ་རྡུལ་འཕྱུར་རེ་ལོག་སོང་ངོ་། བླ་མའི་དྲུང་དུ་ཕྱིན་ན་བཀའ་བཀྱོན་གནང་ཡོང་བསམས། རོ་ཧ་ལ་ཟེར་བ་རྣམས་ལ་འགམས་ནས་ཕྱིན། ཧུ་ལུ་ཟེར་བ་རྣམས་རྡོག་པས་བརྡུངས། སྔར་གྱི་ཤིང་སྡོང་གི་རྩར་ཕྱིན་ནོ།