བུ་མོ་སོ་ཁ་འདི་ལི་སྨན་ཅང་ཤེས་རྟས་སྲིན་པོའི་ལག་ནས་ཁ་ཕྲལ་ཏེ་རྒྱལ་སྲིད་དང་ཕྲད་པ། རོ་སྒྲུང་།

491/545

 

ཡང་རྒྱལ་བུས་ཤིང་སྡོང་གི་རྩར་ཕྱིན་ནས། བླ་མ་ཀླུ་སྒྲུབ་སྙིང་པོ་ཡིན།། ང་རང་རྒྱལ་བུ་བདེ་སྤྱོད་བཟང་པོ་ཡིན།། རལ་གྲི་ངར་མ་རྡོ་ཆོད་ཡིན།། དྲ་བ་ལྕགས་ཀྱི་མིག་དགུ་ཡིན།། ཏོག་མ་སེང་ལྡེང་སྨུག་པོ་ཡིན།། ཞགས་པ་འཕྲུལ་གྱི་ཨ་ལོང་ཡིན།། མར་ཟན་ཟོས་པས་འཛད་མེད་ཡིན།། རོ་ཁོག་བབ་བམ་ཤིང་སྡོང་གཅོད།། བྱས་པས་རོ་དེ་བབས་བྱུང་སྟེ་ཏོག་མས་བརྡུངས། དྲ་བའི་ནང་དུ་བརྫངས། ཞགས་པས་བསྡམས་ནས་ཁུར་ཡོང་ངོ་། ཡང་གོམ་པ་བདུན་ཙམ་སླེབས་པའི་སར། རྒྱལ་པོ་ལས་ཟད་ཁྱོད་ཀྱི་ཁ་ནས་གརམ་ནི་ཡོང་བ་མིན། ངས་རོ་སྒྲུང་ཞིག་བཤད་ཀྱི་ཉོན་ཨང་ཟེར་ནས་སྒྲུང་བཤད་དོ། ལུང་པ་ཆེན་པོ་ཞིག་ན་རྒན་རྒོན་གཉིས་ལ་བུ་མོ་མཁའ་འགྲོ་མའི་མཚན་དང་ལྡན་པ་ཁྱད་འཕགས་ཤིག་ཡོད་པར་གདའ། བུ་མོ་བེ་ནི་ཕ་མར་བརྩེ་ཞིང་མི་སྣང་དང་མཐུན་པ་ཞིག་ཡོད། ནམ་ཞིག་ནས་སྲིན་པོ་ཞིག་ཕོ་གསར་གཅིག་ཏུ་སྤྲུལ། སྤུ་ཕྲུག་དཀར་པོའི་གོས་ཤིག་གྱོན། ལག་ཏུ་མདའ་གཞུ་ཁྱེར་ནས་རྒན་རྒོན་གཉིས་ཀྱི་རྩར་ཡོང་། ཁྱོད་གཉིས་ཀྱི་བུ་མོ་དེ་ང་ལ་སྟེར་རོགས་བྱས་པར། རྒན་རྒོན་གཉིས་ནས་ངེད་རང་གི་བུ་མོ་འདིའི་མིང་ཤེས་ན་སྦྱིན་པས་ཆོག མིང་མི་ཤེས་ན་མི་སྟེར་བྱས་པས་ཁོ་ལོག་སོང་ངོ་། དེ་ནས་ཉིན་གཅིག་ཁོས་ཕྲག་པ་གཡས་ལ་རྟ་རོ་གཅིག་བཀལ། གཡོན་ལ་མི་རོ་ཞིག་བཀལ། བྱིས་པའི་རོ་ཞིག་ཁར་མུར་མུར་བྱེད་ཅིང་ཡོག་ག་ཡོག་གིན་ཡོང་བ་དང་། ཝ་མོ་གཅིག་འདུར་འདུར་བརྒྱུགས་ཡོང་སྟེ། ཨ་ཕོ་སྲིན་པོ་ང་ལ་ཤ་ཞིག་བྱིན་དང་བྱས་པས། ཤ་སྦྱིན་པས་ཆོག ཁྱོད་ཀྱིས་ལུང་པའི་མདའི་རྒན་རྒོན་གཉིས་ཀྱི་བུ་མོའི་མིང་ཤེས་པ་གྱིས་ཤོག་དང་། ད་དུང་ཁྱོད་ལ་ཤ་སྟེར་ཆོག་བྱས་པས། ཝ་མོ་དེ་ལུང་པ་མདའི་རྒན་རྒོན་གཉིས་ཀྱི་གཡའ་ཤིང་བུ་གུར་གབས་ནས་ཉལ་བསྡད་པ་དང་། དགོང་མོའི་ཆ་ལ་གླེང་མོ་ཅི་ཡང་མ་བྱུང་། ཕྱི་ཉིན་ཉི་མ་ཤར་བའི་དུས་སུ་ཨ་མ་དེས་བུ་མོ་སོ་ཁ་འདི་ལི་སྨན་བཞེངས་ལ་ཚ་ཚ་འཐུང་བར་བྱོན་བྱས་པ་དང་། ཝ་མོ་དེས་གོ་སོང་རིག་སོང་ཐོས་སོང་ཟེར་ཕྱིན་ནོ། ཝ་མོ་དེ་ཁོའི་རྩར་སླེབས་ལ་ཁད་དུ་གྲོག་རོང་ཞིག་ལ་རྒྱངས་ཏེ་མཆོངས་པ་དང་། མོའི་མིང་བརྗེད་དོ། ཝ་མོ་དེ་གྲོག་རོང་དེ་ལ་ཕར་མཆོང་ཚུར་མཆོང་བྱེད་ཀྱིན་བསྡད་པས། ཡར་ཤོག་ཁྱོད་གང་བྱེད་ཀྱི་ཡོད་བྱས་པ་དང་། ད་གིན་མིང་ཤེས་ཀྱི་ཡོད་དེ་མིང་དེ་གྲོག་རོང་འདིར་མཆོང་དུས་བརྗེད་སོང་བྱས་པས། ད་དུང་ཤ་འདི་བཟས་ནས་ཉོན་ཤོག་ཟེར། ཡང་ཝ་མོས་ཤ་བཟས་ནས་ཉན་དུ་ཕྱིན་པ་དང་། སྔར་བཞིན་གཡའ་ཤིང་དུ་ཉལ་ནས་ཉན་བསྡད་པས། མཚན་ལ་གླེང་མོ་བྱེད་པ་མ་ཐོས། སྔ་དྲོ་ཉི་མ་ཤར་བ་དང་། བུ་མོ་སོ་ཁ་འདི་ལི་སྨན་བཞེངས་ལ་ཚ་ཚ་འཐུང་བར་བྱོན་བྱས་པ་དང་། ཡང་ཝ་མོ་དེས་གོ་སོང་རིག་སོང་ཐོས་སོང་བྱས་བརྗེད་ཀྱིས་དོགས་ནས་བུ་མོ་སོ་ཁ་འདི་ལི་སྨན་ཟེར་བཞིན་ཕྱིན། སྲིན་པོ་ཁོ་གྲོག་པོའི་ཚུར་ངོས་ན་སླེབས་ཡོད་ཅིང་བུ་མོ་སོ་ཁ་འདི་ལི་སྨན་ཟེར་བཞིན་རྩར་སླེབས། སྲིན་པོ་ཁོས་གསེར་གཡུ་མང་པོ་ཁྱེར་ཏེ་བུ་མོ་སློང་དུ་ཕྱིན། རྒན་རྒོན་གཉིས་ལ་གསེར་གཡུ་མང་པོ་བྱིན་ནས་ཁྱོད་ཀྱི་བུ་མོ་འདི་ང་ལ་སྟེར་རོགས་བྱས་པར། རྒན་རྒོན་གཉིས་ཀྱིས་རིན་གསེར་གཡུ་བྱུང་ན་དགའ་སྟེ། ཁ་སང་ནས་བུ་མོའི་མིང་ཤེས་ན་སྟེར་བྱས་པ་ཡིན་པས་མིང་མི་ཤེས་ན་མི་སྟེར་བྱས་པར། མིང་ལ་བུ་མོ་སོ་ཁ་འདི་ལི་སྨན་ཟེར་བྱས་པར། རྒན་རྒོན་གཉིས་ངོ་ནག་པོར་གྱུར་ནས། ད་ནི་མ་སྟེར་ཐབས་མེད་ཡིན་པས་ཁྱོད་གནངས་ཉིན་བསུ་བར་ཤོག་ཟེར་བས་ཁོ་གནངས་ཉིན་དེར་བསུ་བར་ཡོང་ངོ་། རྒན་རྒོན་གཉིས་ཀྱིས་བུ་མོ་བསུ་བར་རྟ་ཁྲིད་མི་ཡོང་བ་གང་ཡིན་བྱས་པར། ཁོས་ཁ་སང་རྟ་ཁྲིད་ཤོག་ཟེར་མཁན་ནི་མི་འདུག་བྱས་པ་དང་། རྒན་རྒོན་གཉིས་ཀྱིས་བུ་མོ་རྐང་ཐང་ལ་འགྲོ་དགོས་པས་ངེད་རང་གི་རྟ་ལ་བུ་མོ་བསྐྱོན་ནས་གཏོང་རྒྱུ་ཡིན་ཟེར། བུ་མོ་ན་རེ། རྒན་རྒོན་གཉིས་ལ་བུ་མོ་གཅིག་ལས་མེད་པ་དེ་ཡང་སྲིན་པོ་ལ་སྟེར་བ་ཡིན་ནམ། མདང་གི་རྨི་ལམ་ནི་ལོག ད་ཕ་མ་གཉིས་དང་འཕྲད་པ་དཀའ། ཕ་མའི་བཀའ་བཅག་ན་ནི་མི་འཐུས་བྱས་པ་དང་། རྒན་རྒོན་གཉིས་ཀྱི་ནན་མ་ཐེག་པར་འགྲོ་བའི་གྲབས་བྱས། དེར་ཅང་ཤེས་ཀྱི་རྟ་ལེགས་པོ་ཞིག་ཡོད་པའི་རྩར་ཕྱིན་པ་དང་། རྟ་ཕོ་ན་རེ། བུ་མོ་ཁྱོད་ད་རེས་མ་ཕྱིན་ན་ཁོས་ཟ་བ་ལས་མེད་པས། ཕྱིན་པ་དྲག འབྲུ་རྡོག་བདུན་པོ་འདི་ཐུམ་བུ་གྱིས་ལས་སྐེ་ལ་ཐོགས། མི་དགོས་དགོས་པའི་དུས་ཤིག་ཡོང་། དེ་དུས་འབྲུ་རྡོག་བདུན་པོ་འདི་ཕྱོགས་བཞིར་གཏོར་བས་ཁྱེད་རང་ཐར་བ་ཡོད་པས་ད་རེས་རྒྱུགས་ཟེར། བུ་མོ་དེ་ཁོ་དང་མཉམ་དུ་ཕྱིན་ནོ། ལུང་པའི་མདའ་རུ་སླེབས་པ་དང་ཁོ་ལུག་མགོ་ཞིག་ལ་བཞོན་ཏེ། བུ་མོ་ཁྱོད་རང་ངའི་རྒྱབ་ཏུ་ཞོན་ཅིག་ཟེར་བས། མོ་མི་བཞོན་ཀ་མེད་བྱུང་ནས་བཞོན་ནོ། ལམ་གསུམ་མདོ་ཁ་ཞིག་ཏུ་སླེབས་པ་དང་ལམ་ཁྲ་ཟི་རི་བ་ཞིག་འདུག་པ་དེར་ཞུགས་ཕྱིན་པས་ལྕགས་མཁར་དགུ་ཐོག་གནམ་ལ་རེག་པ་ཙམ་ཞིག་འདུག་པ་དེའི་ནང་ཕྱིན་པ་དང་། བཟའ་བཏུང་ལོངས་སྤྱོད་ཕུན་སུམ་ཚོགས་པ་འདུག་པས་དེར་ཁོ་ནི་ཉིན་རེ་བཞིན་འགྲོ་དགོས་པ་དང་། ཁྱོད་ཉིན་རེ་བཞིན་འགྲོ་དགོས་ན་ང་གཅིག་པོར་སྐྱོ་བ་འདུག་བྱས་པས། ཉིན་གཅིག་ཁྱོད་ཉིན་རེ་བཞིན་འགྲོ་དགོས་ན་ང་གཅིག་པོར་སྐྱོ་བ་འདུག་བྱས་པས། ཉིན་གཅིག་ཁྱི་གུ་དང་ཟན་གོང་གཅིག་བཞག་གོ ། སྔ་དྲོ་ཟན་གོང་ཁྱི་གུས་ཟོས། ཕྱི་དྲོ་ཟན་གོང་གིས་ཁྱི་གུ་ཟོས་སོ། ཉིན་གཅིག་རེའུ་གཅིག་དང་རྩྭ་ཆུན་གཅིག་བཞག་གོ། སྔ་དྲོ་རེའུས་རྩྭ་ཆུན་བཟས། དགོང་མོ་རྩྭ་ཆུན་གྱིས་རེའུ་བཟས། དེ་ནས་ཉིན་ཤས་སོང་བ་དང་། ལྡེ་མིག་ཆག་པ་གཅིག་མོ་ལ་བཞག སྒོ་རྣམས་ཕྱེ་བ་དང་བུ་མོ་མིག་འཕྲུལ་ནས། ལ་ལར་དགུན་ཁ་ཆུ་འཁྱགས་པ་དང་། ལ་ལར་ཞིང་འདེབས་པ། ལ་ལར་ལོ་ཐོག་སེར་བས་བཅོམ་པ། ལ་ལར་བལྟས་ན་བཙས་མ་བརྔ་བ། ལ་ལར་བལྟས་ན་གཡུལ་ལས་བྱེད་པ་སོགས་སྐད་ཅིག་ཉིད་ལ་མིག་འཕྲུལ་མང་པོ་མཐོང་། སྒོ་ནག་པོ་དྲེག་པ་ཆགས་པ་ཞིག་འདུག་པ་དེ་ལྡེ་མིག་གང་གིས་ཀྱང་ཕྱེ་མི་ཐུབ་ཅིང་། སིང་པོ་ཞིག་བཏུངས་ནས་གན་རྐྱལ་ཉལ་བསྡད་པས་གདུང་སྲུབ་ན་ལྡེ་མིག་གཅིག་འདུག ལྡེ་མིག་དེ་བླངས་ནས་སྒོ་ཕྱེ་བ་དང་། དེའི་ནང་དུ་གཡས་ན་རྒན་མོ་ཞིག་བསྙེས་ནས་བསྡད། གཡོན་ན་དབུགས་ཀྱི་སོར་སྒྲ་སྒྲོག་པ་མང་པོ་འདུག་པ་ལ་བལྟས་པས། རྒན་མོ་ན་རེ། རླག་མོ་བསོད་བདེ་སྐམ་པོ་ཁྱོད་འདྲ་སླེབས་སམ་ཟེར། བུ་མོ་དེས་གང་ལ་ཟེར་བྱས་པ་དང་། ཁཽད་ལས་ལྷག་པ་ངེད་ཚོས་ཀྱང་བྱས་ཟིན། རྒས་པའི་མཐའ་མའི་རོ་དེ་ཚོ་ཨ་མཐོང་། གཞོན་དུས་ཁོ་ཡི་ཆུང་མ་བྱེད་ཅིང་། རྒས་པའི་རྗེས་སུ་ངེད་ཚོ་དང་འདྲ་ཟེར་བར། བུ་མོ་དེ་སྐྲག་ནས་རྒན་མོར་ཐབས་ཤེས་གང་ཡོད་དམ་སློབས་བྱས་པས། ཁྱོད་ལ་ད་རེས་ལྡེ་མིག་རག་འདུག་པས་བསོད་ནམས་ཆེ། ངེད་ཚོ་ལ་ལྡེ་མིག་འཇོག་གི་མེད། ད་ཁྱོད་རང་རྒན་མོ་ཕ་གིའི་སྤྱི་གཙུག་ནས་འཐེན་དང་། དེར་གསེར་གཡུའི་རྒྱན་ཆ་མང་པོ་ཡོད་པས་དེ་རྣམས་ཐོགས་ལ། རྒན་མོ་དེའི་པགས་པ་གྱོན། སྟེང་དུ་གོས་ཧྲུལ་རྣམས་གྱོན་ནས་ལུང་པའི་མདའ་མ་གི་ན་རྒྱལ་པོ་ཞིག་ཡོད་པས་དེར་ཁ་བལྟས་ནས་རྒྱུགས་ཟེར། བུ་མོ་དེས་རྒན་མོས་བཤད་པ་བཞིན་གསེར་གཡུའི་རྒྱན་རྣམས་བཏགས། རྒན་མོའི་པགས་པ་གྱོན། དེའི་སྟེང་གོས་ཧྲུལ་རྣམས་གྱོན། འཛར་ར་ཕྲན་བུ་ཞིག་ཁྱེར་ནས་ལུང་པའི་མདར་ཕྱིན་ནོ། བུ་མོ་དེ་ཕྱིན་ནས་ཡུན་རིང་མ་སོང་བར་སྲིན་པོ་དེ་ནང་དུ་སླེབས། གང་སར་མྱུལ་ཡང་བུ་མོ་དེ་མ་རྙེད་པ་དང་། ཁོས་ལུག་མགོ་དེ་ལ་བཞོན་ནས་མོའི་རྗེས་ལ་བརྒྱུགས་སོ། བུ་མོའི་རྩར་སླེབས་པ་དང་། རྒན་མོ་ཞིག་ལས་བུ་མོ་དེ་མཐོང་རྒྱུ་མེད་པས་ཁོ་ན་རེ། རྒན་མོ། བུ་མོ་གཅིག་སོང་བ་ཨེ་མཐོང་ཟེར་བར། རྒན་མོར་བརྫུས་པའི་བུ་མོ་དེས་མཐོང་མ་བྱུང་བྱས་པས། ཁོས་འབུད་རྒྱག་བརྒྱབ་པས་མོ་འགྱེལ་ལོ། མོ་འགྱེལ་བ་དང་ཁྲོབ་ཟེར་བའི་སྒྲ་ཞིག་བྱུང་བས། ཁྱོད་ཀྱི་ཁྲོབ་ཁྲོབ་ཟེར་བ་དེ་གང་ཡིན་བྱས་པར། རྒན་གོག་རུས་པ་འཁྲོག་པ་ཡིན་པར་འདུག་བྱས་པ་དང་། ཁོ་སོང་ཞིང་། དེ་ལྟར་ལན་གསུམ་འཕྲད་པའི་རྟིང་མ་བུ་མོ་དེས་ལུང་པའི་མདའི་རྒྱལ་པོ་དེའི་ཞིང་ཁའི་སྲུབ་ཏུ་ཡིབ་བསྡད། རྒྱལ་པོའི་མཁར་གྱི་སྟེང་ནས་འོང་སྲུང་བས་འོ་འབོད་བྱས་རུང་མོས་མ་ཐོས་པས་མོའི་རྩར་ཡོང་བ་དང་། རྒན་མོ་རྒས་ཤིང་ཁོག་པ་འཁར་བ་ལ་བརྟེན་པ་ཞིག་འདུག་སྟེ་རྒན་མོ་ཁྱོད་གང་ནས་འོང་བ་ཡིན་བྱས་པ་དང་། ངེད་ཕུ་ཡ་གི་ནས་ཡོང་བ་ཡིན་ལགས། འདིར་ཡོས་རྔོ་མཁན་དང་ཆུ་ལེན་མཁན་འདྲ་དགོས་ཀྱི་ཨེ་ཡོད་ལགས་བྱས་པ་དང་། ཁྱོད་ཀྱིས་ཡོས་བརྔོ་རྒྱུ་དང་ཆུ་ལེན་རྒྱུ་ཨ་འཕེར་ཟེར་བས། ལྟོགས་འཁྱགས་ཀྱིས་མ་མནར་ན་ཐུབ་ལགས་བྱས་པ་དང་། ཁྱོད་ཀྱིས་ཐུབ་ན་དགོས་མཁན་ཡོད་འགྲོ་ཟེར་ཁྲིད་དོ། ནང་དུ་སླེབས་པ་དང་། བུ་མོ་ཆུ་ལེན་ཐལ་འཕྱག་བྱེད་དུ་བཅུག ཉིན་གཅིག་མོ་ཆུ་ལེན་པར་འགྲོ་དུས་ཆུ་ཁར་པགས་པ་ཕུད་ནས་ཁྲུས་རྒྱག་པའི་སྐབས་སུ་རྟ་རྫི་བ་ཞིག་གིས་རྟ་ཆུ་ལྡུད་པར་ཡོང་བ་དང་ཐུག ཁོག་བུ་མོ་མཚར་སྡུག་ལྡན་པ་གསེར་གཡུའི་རྒྱན་གྱིས་སྤྲས་པ་ཞིག་ཡོད་པ་མཐོང་སྟེ་ཁོ་མགྱོགས་པར་བརྒྱུགས་ཏེ་རྒྱལ་པོའི་མདུན་དུ་ཕྱིན་ནས་གནས་ཚུལ་ཇི་བཞིན་ཞུས་པ་དང་། རྒྱལ་པོས་བུ་མོ་དེ་ཚུར་བོས་ཤོག རང་རེ་དཔོན་གཡོག་ཚོས་མོའི་རྫུས་རྟགས་ཚོ་དབྲོལ་ཅིག་གསུངས། མོ་ནང་དུ་སླེབས་པ་དང་། རྟ་རྫི་དང་གཡོག་མོ་གཅིག་གཉིས་ཀྱིས་ཀུ་རེ་ལ་བརྙས་ནས་རྒན་མོ་དེ་ཕར་འཐེན་ཚུར་འཐེན་བྱས་པས། དེར་མོའི་པགས་པ་དང་གོས་ཧྲུལ་རྣམས་ཐེར་ཐོར་དགུ་ཐོར་དུ་ཕྱིན། དེར་རྒྱལ་པོ་ཕེབས་དུས་མཚར་སྡུག་འོད་ཆགས་པ་ཞིག་འདུག་པ་མཐོང་། རྒྱལ་པོས་བུ་མོ་ཁྱོད་རྫུས་རྟགས་བྱེད་པ་ཅི་ཡིན་གསུངས་པས། བུ་མོས་སྔོན་གྱི་ལོ་རྒྱུས་རྣམས་ཞུས། ངའི་པགས་པ་དེ་ཞག་གཉིས་མ་དབྲས་ན་ཡོང་བ་ཡོད་ཞུས་པས། རྒྱལ་པོ་ན་རེ། བུ་མོ་ཁྱོད་ངའི་ནང་དུ་བསྡད་ཕྱིན་ལུང་པའི་ཕུའི་སྲིན་པོ་དེས་ཅང་གནོད་མི་ཡོང་ཟེར་རོ། གནོད་འཚེ་བྱེད་མི་ཐུབ་ན་གོ་ཆོད་ལགས་ཟེར་རོ། དེ་ནས་བུ་མོ་དེ་རྒྱལ་པོའི་ཇོ་མོ་བྱས་སོ། དུས་ཚོད་འགའ་ཞིག་སོང་བ་དང་བུ་མོ་དེ་ལ་གཟུགས་པོ་འཁོར་རོ། ཕྲུ་གུ་མ་སྐྱེས་ཙམ་ལ་རྒྱལ་པོ་ཆེན་པོ་དཔོན་གཡོག་དང་བཅས་པ་ཚོང་བསྐོར་ལ་བྱོན་ནོ། རྒྱལ་པོ་བྱོན་པའི་རིང་བུ་ལུས་སྟོད་གསེར་ལ་བྱས་པ། ལུས་སྨད་གཡུ་ལ་བྱས་པ། སྤྱན་མིག་ཁྲ་བོ་གཟི་ལ་བྱས་པ་ཞིག་སྐྱེས་སོ། ་དེར་བློན་འབངས་རྣམས་ཤིན་ཏུ་དགའ་ནས་རྒྱལ་པོ་ལ་ཞུ་བར་བཏང་། རང་རེའི་བཙུན་མོ་འདི་ལ་བུ་ལུས་སྟོད་སེར་པོ་གསེར་ལ་བྱས་པ། ལུས་སྨད་སྔོན་པོ་གཡུ་ལ་བྱས་པ། སྐེད་པ་དཀར་པོ་དུང་ལ་བྱས་པ། སྤྱན་མིག་ཁྲ་བོ་གཟི་ལ་བྱས་པའི་སྲས་ཁྱད་འཕགས་ཤིག་འཁྲུངས་བྱུང་བས་མགྱོགས་པར་ཕེབས་པ་ཞུ་ཟེར་བའི་བང་ཆེན་བཏང་ནས་ཞུ་ཐོ་བསྐུར་རོ། བང་ཆེན་པོ་ཞིག་འཛེགས་ཕྱིན་པ་དང་ལ་རྩེ་ན་སྲིན་པོ་དེ་ཡོག་ག་ཡོག་གིན་བསྡད་འདུག་སྟེ་ཁོས་ཁྱེད་བྱོན་པ་ལགས་སམ་ཟེར། འོ་ལགས་སོ་སྐུ་ཁམས་བདེའམ་བྱས་པས། ཁྱེད་གང་དུ་འགྲོ་མཁན་ཡིན་ཟེར། ངེད་ཀྱི་དཔོན་མོ་སོཁ་འདི་ལི་སྨན་ལ་སྲས་ཁྱད་འཕགས་ཤིག་འཁྲུངས་བྱུང་བས་ངེད་རྒྱལ་པོ་ལ་ཞུ་བར་འགྲོ་བ་ཡིན་བྱས་པས། ཁྱོད་ལྟོགས་ཡོད་འགྲོ། འདིར་ཏོག་ཙམ་སྡོད་ལ་ལྟོ་འགྲངས་ངོམས་ཤིག་ཟེར་ནས་བང་ཆེན་ལ་དྲོ་ཞིག་བྱིན། དྲོ་ཟ་བའི་རིང་ལ་རྒྱལ་པོར་འབུལ་རྒྱུའི་ཡི་གེ་དེར་སྲིན་པོས་བཟོ་བཅོས་བརྒྱབ་དོན་དུ། རྒྱལ་པོའི་དྲུང་དུ་ངེད་འཁོར་རྣམས་ཀྱིས་ཞུ་བར། རང་རེའི་བཙུན་མོ་འདི་ལ་ལུས་སྟོད་བུ་མོའི་གཟུགས་ལ་སྤྲེའུའི་མགོ་ཡོད་པའི་ལྟས་ངན་ཞིག་སྐྱེས་བྱུང་བ་འདི་གང་འདྲ་བྱ་རྒྱུ་ཡིན་ཟེར་བ་བྲིས་སོ། དེར་བང་ཆེན་དེ་ཕྱིན་ནས་རྒྱལ་པོའི་སྤྱན་སྔར་ཡི་གེ་ཕུལ་བ་དང་། རྒྱལ་པོས་ཡིག་ལན་མཛད་དོན། རང་རེའི་བློན་འབངས་རྣམས་ལ་སྤྲིངས་པ། ངེད་རང་གི་བུ་མོ་དེ་ལ་ཕྲུ་གུ་གང་སྐྱེས་ཀྱང་ང་རང་གི་ཡིན་པས་ང་རང་མ་སླེབས་བར་ལ་རང་སོར་ཞོག་ཟེར་བ་བྲིས། བང་ཆེན་དེ་ཚུར་ལོག་ཡོང་དུས་ཁ་སང་གི་སྲིན་པོ་དེ་ལ་ཁར་ཡོད་ཅིང་། ཁོས་ཁྱོད་ལྟོགསཡོད་འགྲོ་ཟེར་ནས་ལྟོ་སྐོམ་བྱིན། ལྟོ་ཟ་བའི་བར་ལ་ཁོས་ཡི་གེར་བཅོས་བརྒྱབ། རང་རེའི་སྐྱེས་པ་རྣམས་ཀྱིས་གོ་མཚོན་ཐོགས། བུ་མོ་རྣམས་ཀྱིས་བཙག་ཐལ་ཁྱེར་ནས་བུ་མོ་མ་མད་གཉིས་ཕྱིར་ཕུད་དེ་ངྨ་སླེབས་གོང་ལ་མེད་པར་གྱིས་ཟེར་བ་ཁོ་ལ་བསྐུར་རོ། དེར་ཁོ་ཡུལ་དུ་སླེབས་པ་དང་། རང་རེའི་རྒྱལ་པོའི་ཡི་གེའི་ནང་བུ་མོ་མ་མད་ཐོན་ཟེར་བ་འདུག་པས་མངའ་འོག་རྣམས་མ་དགའ། འོན་ཀྱང་རྒྱལ་པོའི་བཀའ་གཅོག་ཐབས་མེད་པས་བུ་མོ་མ་མད་གཉིས་བོང་བུ་གྭ་དམར་ཞིག་ལ་བསྐྱོན་ནས་ལུང་པའི་མི་རྣམས་ཀྱིས་ལ་གཤམ་དེར་བསྐྱལ་ལོ། བུ་མོ་དེ་ལ་ཁར་སླེབས་དུས་སྲིན་པོ་ཁོ་ཡང་དེར་སླེབས་འདུག འོ་བུ་མོ་ཁྱོད་འོང་ངམ་ཟེར། བུ་མོས་ཡོང་ལགས་བྱས་པས། ཕྲུ་གུ་དེ་ག་ན་ཡོད་སྟོན་དང་ཟེར་བར། བུ་མོས་ཕྲུ་གུ་རུམ་ནས་བསྟན་པས་སྔར་འདི་འདྲ་བ་ཟ་མ་མྱོང་ཟེར་ཁྱུར་མིད་བཏང་ངོ་། བུ་མོ་ཁྱོད་ལྟོགས་ཀྱི་ཡོད་འགྲོ་ཟེར་ཟས་གྲོད་པ་འགྲངས་ངོམས་ཤིག་བྱིན། དེར་བུ་མོ་ལ་སྲིན་པོས་སྨྲས་པ། བུ་མོ། རོ་སྟོད་གསེར་ལ་བྱས་པ་འདི་ངའི་གསེར་ཁྱེར་བས་བྱུང་། རོ་སྨད་གཡུ་ལ་བྱས་པ་དེ་ངའི་གཡུ་ཚོ་ཁྱེར་བས་བྱུང་། སྐེད་པ་དུང་ལ་བྱས་པ་དེ་ང་ཁྱོད་ལ་སེམས་དཀར་བས་བྱུང་བ་ཡིན། ད་ཁྱོད་བཟའ་རྒྱུ་ཡིན་ཏེ་སྔོན་ལ་ངའི་མགོ་ལ་སྲོ་མ་ཞིག་སྒྲུགས་དང་སྙིང་རེ་རྗེ་ཟེར། མོས་ཁོའི་མགོ་ལ་སྲོ་མ་སྒྲུག་དུས་བུ་མོའི་བསམ་བློ་ལ། ང་ལ་འདི་ལས་ཁག་པ་དང་སྡུག་པ་མི་ཡོང་བསམས་ཏེ་སྐེ་ནས་འབྲུ་བདུན་པོ་དེ་གཏོར་ནས་ངའི་ཅང་ཤེས་ཀྱི་རྟ་བྱས་པ་དང་རྟ་ཀྲོང་དེ་སླེབས་བྱུང་སྟེ། ཁོའི་མགོའི་འོག་ཏུ་ག་ལེར་སྟེང་གོས་ཤིག་བཞག་སྟེ་རྟ་དེ་ལ་བཞོན་མིག་གིས་མཐོང་སར་མེད་པར་གྱུར། བུ་མོ་དེ་སྔར་མིག་གིས་མ་མཐོང་བའི་ས་སྟོང་རྒྱང་རིང་པོ་ཞིག་ཏུ་སླེབས་པ་དང་རྟ་དེ་ཤི་རན་ནོ། དེར་མོ་སེམས་སྐྱོ་ནས་ངུས་པས། ཁ་བ་བུ་ཡུག་འཚུབ་བྱུང་སྟེ། རྟ་དེས་བུ་མོར་སྨྲས་པ། བུ་མོ་མ་ངུ་ཞིག ངུས་ན་འཁྱགས་གྲིར་འཆི། ངའི་ཁ་ལ་ཉོན་དང་ད་ཁྱོད་སྐྱིད་པོ་ཡོང་བ་ཡོད། ད་ཁྱོད་རང་ངའི་རོ་འདིའི་པགས་པ་ཧེ་ཧེ་ཟེར་བཤུས་ནས་ཐང་བཞི་ལ་ཁྲོམས། ཀླད་པ་འདི་བཏོན་ནས་བྲག་ཡ་གིའི་མགོ་ལ་སྤུངས། སྤུ་རྣམས་ཐོགས་ལས་རི་ལྡེབས་ལ་གཏོར། མགོ་བོ་པགས་པའི་དཀྱིལ་དུ་ཞོག སྙིང་དང་མཁལ་མ་གཉིས་པོ་ཁུག་ཏུ་ཞོག གློ་སྙིང་ཐམས་ཅད་ནང་དུ་ཞོག་ཟེར་རོ། ཡང་བུ་མོས་ངུས་པས་ཁ་ཆར་འབབ། ངུ་འཕྲོ་ལ་ཧེ་ཧེ་ཟེར་པགས་པ་བཤུས་པས་ཉི་མ་དྲོ་པོ་བྱུང་ངོ་། རྟས་གང་ཟེར་བ་དེ་བཞིན་བྱས། བུ་མོ་དེ་ཐང་ཆད་ནས་གཉིད་ལ་སོང་བ་དང་། དར་ཅིག་ནས་གཉིད་སད་ལ་མ་སད་ཀྱི་སྐབས་སུ་ཁྱི་སྐད་ཅིག་གོ་བྱུང་བས་ཧད་དེ་ལངས་ནས་ལྟ་དུས་ལུང་པ་དེའི་ཕུ་ན་གངས་རི་ཆགས་ཤིང་ཆུ་འབབ་པ། མདའ་ན་གཤོངས་ཞིང་ཡོད་པ། བར་ན་རྩུ་ཁ་གཡུའི་གཞོང་པ་འདྲ་བ་ཞིག་ཡོད་པ། མཁར་ཁྲུ་གང་གནམ་ལ་མ་རེག་པ་ཁྲུ་གང་ས་ལ་མ་རེག་པ་ཞིག་ཡོད་པ་དའི་མཐའ་ལ་ལྕགས་རི་ཡོད་པ། ཕྱོགས་བཞི་ན་ལྕོག་བཞི་ཡོད་པ། དེའི་ནང་དུ་ཕྱིན་པ་དང་མི་མང་པོ་ཡོད་ཅིང་། ཚང་མས་དཔོན་མོ་ལགས་ཕྱག་ཕེབས་ཟེར་གྱི་འདུག་གོ། མོ་ཡན་རྣམས་ནི་གློ་བའི་ཡོན་ཏན་ཡིན་པར་འདུག དཀྱིལ་གྱི་སྤེལ་དེ་མགོ་ལ་བྱུང་ཞིང་། ཁྱི་གཉིས་མཁལ་མ་བྱུང་བ་ཡིན་པར་འདུག སྒོ་དེའི་གདོང་ན་སྔ་ར་གྱི་རྟ་དེ་ལས་གཞོན་པ་ཞིག་འདུག་པས་དེ་ནི་སྙིང་གི་ཡོན་ཏན་ཡིན་པར་འདུག གྲོང་ཁྱེར་དེའི་འཛོམས་གཉིས་ན་ཆུ་མིག་རེ་རེ་འདུག་པ་དེ་མིག་གི་ཡོན་ཏན་ལས་བྱུང་བ་ཡིན་པར་འདུག གློ་མཆིན་གཉིས་ལ་ཤ་མར་གྱི་རྩིག་པ་རི་རབ་ཙམ་རེ་ནང་ན་འདུག་པ་ཡིན་པར་གདའ། མཁྲིས་པ་ནང་དུ་ཡོད་པའི་སྟོབས་ཀྱིས་གསེར་གཡུ་ལ་སོགས་ནོར་ཁྱད་འཕགས་སྣ་ཚོགས་འདུག གྲོད་པ་ཐང་ལ་བཀྲམས་པས་ནེའུ་གསིང་གཡུ་གཞོང་ལྟ་བུ་བྱུང་བ་ཡིན་པར་འདུག ཀླད་པ་ཕུ་རུ་ཆགས་པས་གངས་རི་ཀ་བ་བཙུགས་པ་འདྲ་བ་བྱུང་བ་ཡིན་པར་འདུག སྤུ་རྣམས་རི་ལ་གཏོར་བས་རྩི་ཤིང་གང་དགོས་བྱུང་བ་ཡིན་པར་འདུག བུ་མོ་དེས་དཔོན་མོ་བྱས། བདེ་ཞིང་སྐྱིད་པའི་འཚོ་བ་བསྐྱལ་ནས་ལོ་གཅིག་སོང་བ་དང་། བུ་མོ་དེའི་ཁྱོ་བོ་རྒྱལ་པོ་དེས་འཚོལ་བར་ཡོང་། བུ་མོ་དེ་ཉིན་གཅིག་ཕོ་བྲང་གི་རྩེར་སྐོར་བར་ཕྱིན། ཕོ་བྲང་མདུན་གྱི་ལམ་ནས་སྔར་མི་ཡོང་བའི་རྟ་པ་མང་རབ་ཅིག་བྱུང་བར། བུ་མོས་ལྟ་ཞིབ་ལེགས་པར་བྱས་པས་སྔར་གྱི་རྒྱལ་པོ་དེ་ཡིན་པ་ངོ་ཤེས་ནས་སྐས་རིང་རྣམས་ལས་བབས། སྐས་ཐུང་རྣམས་ལས་འཆོང་བཞིན་ཕྱིན་པས་རྒྱལ་པོ་རྟ་ནས་བབས་པ་དང་བུ་མོ་སླེབས་པ་ཐུག དགའ་ཚོར་དཔག་མེད་སྐྱེས་ཏེ་རྒྱལ་པོ་ལ་བཅངས་ནས་མཆི་མ་ལྷུངས། དེར་གོང་ག་ཚུལ་རྣམས་རྒྱལ་པོ་ལ་ཞུས་པས། རྒྱལ་པོ་ན་རེ། ཁྱོད་བདེན་པར་འདུག ངས་དེ་འདྲ་ག་ནས་བྱེད་གསུངས་སོ། བློན་པོ་ན་རེ། དེ་རྣམས་བར་གྱི་མིས་གོ་མ་ཆོད་པ་ཡིན་པར་འདུག དཔོན་མོ་ཁྱོད་བདེན་ཟེར། དེར་མོས་རྒྱལ་བློན་རྣམས་ནང་དུ་གདན་དྲངས་བསྙེན་བཀུར་ཕུན་སུམ་ཚོགས་པ་ཞུས་པ་དང་། རྒྱལ་པོ་ན་རེ། འདི་བུ་མོའི་ཕ་མིང་ཡིན་ནམ་གསུངས་པས། ཕ་མ་དང་འཕྲད་པའི་བསོད་ནམས་ཅན་ནི་ང་མིན་པར་འདུག བདག་ལ་ཅང་ཤེས་ཀྱི་རྟ་ཕོ་ཞིག་ཡོད་པའི་བཀའ་དྲིན་ལ་བརྟེན་ནས་བྱུང་བ་ཡིན་ཞུས་པ་དང་། ངེད་ཀྱི་ཁྱིམ་དུ་ཡོང་དུས་རྟ་མེད་པར་གང་ནས་བྱུང་གསུངས་པ་དང་གོང་གི་ལོ་རྒྱུས་རྣམས་རྒྱལ་པོ་ལ་ཞིབ་པར་ཞུས་པས་རྒྱལ་པོ་ཤིན་ཏུ་མཉེས་སོ། ཅང་ཤེས་ཀྱི་རྟ་དེ་ཕ་མ་ལས་བཀའ་དྲིན་ཆེ་བ་ཞིག་བྱུང་འདུག་གསུངས་ཏེ། དེར་རྒྱལ་སྲིད་ཕན་ཚན་གཉིས་རྒྱལ་པོ་ཡབ་ཡུམ་གཉིས་ཀྱིས་ཁྱད་མེད་དུ་བསྐྱངས། རྒྱལ་འབངས་རྣམས་ཀྱང་སྔར་ལས་དར་ཞིང་རྒྱས་པ་ཞིག་བྱུང་བ་ཡིན་པར་གདའ་བྱས་པ་དང་། རྒྱལ་པོ་བདེ་སྤྱོད་བཟང་པོའི་ཁ་ནས་རྟ་དེ་བུ་མོ་དེ་ལ་བཀའ་དྲིན་ཆེ་བ་ལ་ཟེར་ཤོར་བས། རོ་ན་རེ། རོ་ལ་གཏམ་ལན་བྱ་ཁྲ་ཧུར་ཟེར་རོ་དེ་ཤོར་སོང་ངོ་། རྒྱལ་བུའི་བསམ་པ་ལ་བླ་མའི་ཞལ་ནས་རོ་ཁོས་ཅི་ཟེར་ཡང་ཁྱོད་རང་གཏམ་ལན་ཚིག་གཅིག་ཀྱང་མ་འཇལ་གསུང་གི་འདུག་པ་ཡིན་ཏེ་ང་སེམས་ཡེངས་པས་གཏམ་ཞིག་ཤོར། རོ་མེད་པར་ལོག་ཡོང་བ་ལ་ཕན་ཐོགས་མེད་པས་རོ་དེ་ལེན་དུ་འགྲོ་དགོས་བསམས་ནས་ཡང་དུར་ཁྲོད་དེར་ཕྱིན་ཏེ། རོ་ཧ་ལ་ཟེར་བ་རྣམས་ལ་འགམས་ནས་ཕྱིན། ཧུ་ལུ་ཟེར་བ་རྣམས་ཏོག་མས་བརྡུངས། །