བུ་མོ་སླ་ང་སླང་ཆུང་དྲང་སྲོང་གིས་བསྐྱབས་ཏེ་སྲིན་པོའི་ཁ་ནས་ཐར་བ་དང་། བུ་བྱ་ཕོ་ཚ་ལུ་བཙན་གྱི་ཡུལ་ནས་བསུས་ཏེ་ལྷན་དུ་རྒྱལ་སྲིད་བཟུང་བ། རོ་སྒྲུང་།

490/545

 

ཡང་རྒྱལ་བུས་ཤིང་སྡོང་གི་རྩར་ཕྱིན་ནས། བླ་མ་ཀླུ་སྒྲུབ་སྙིང་པོ་ཡིན། ། ང་རང་རྒྱལ་བུ་བདེ་སྤྱོད་བཟང་པོ་ཡིན། ། རལ་གྲི་ངར་མ་རྡོ་ཆོད་ཡིན། ། དྲ་བ་ལྕགས་ཀྱི་མིག་དགུ་ཡིན། ། ཏོག་མ་སེང་ལྡེང་སྨུག་པོ་ཡིན། ། ཞགས་པ་འཕྲུལ་གྱི་ཨ་ལོང་ཡིན། ། མར་ཟན་ཟོས་པས་འཛད་མེད་ཡིན། ། རོ་ཁོག་བབ་བམ་ཤིང་སྡོད་གཅོད། ། ཅེས་བྱས་པས་རོ་དེ་བབས་བྱུང་སྟེ་ཏོག་མས་བརྡུངས། དྲ་བ་དེའི་ནང་དུ་བརྫངས། ཞགས་པ་དེས་བསྡམས་ནས་རྒྱབ་ཏུ་ཁུར་ཡོང་ངོ་། དེ་ནས་གོམ་པ་བདུན་ཙམ་སླེབས་པའི་སར། རྒྱལ་བུ་རྒྱལ་བུ་ཟེར་གྱི་འདུག ཁ་རོག་ཏུ་ཡོང་བ་དང་། རྒྱལ་བུ་ལས་ཟད་ཁྱོད་འདྲའི་ཁ་ནས་གཏམ་ཡོང་བཟོ་མི་འདུག ངས་སྒྲུང་ཞིག་བཤད་ཀྱི་ཉོན་ཨང་ཟེར། ལུང་པ་ཞིག་ན་རྒན་རྒོན་གཉིས་ཡོད་པ་ལ་བུ་མོ་གསུམ་ཡོད་པར་འདུག ཁོང་ཚོར་ནོར་ལུག་ཁྱུ་གཅིག་ཡོད་པ་དེ་རྒད་པོས་འཚོ་བར་འགྲོ་ཡི་ཡོད་པ་འདུག ནམ་ཞིག་གི་ཚེ་རྒད་པོ་ལ་ཁར་སྲིན་པོ་ཞིག་གིས་ཟོས། ལུག་ནག་པོ་གཅིག་ཡོད་པ་དེ་ཡང་བསད་ནས་བཟས། རྒད་པོའི་མགོ་ལྤགས་བཤུས་ནས་སྲིན་པོ་རང་གིས་གྱོན། སྟེང་དུ་ཞྭ་གོས་ལྷམ་གསུམ་གྱོན་ནས་རྒད་པོ་ཡིན་པའི་ཚུལ་བྱས། རྒད་པོ་རང་གི་ཚི་ལུ་དེ་ཁུར་ནས་ལོག་ཕྱིན། རྒན་མོ་དེ་ལུག་བསུར་ཡོང་བ་དང་སྲིན་པོས་སྨྲས་པ། དེ་རིང་ངས་རང་རེའི་བུ་མོ་ཆེ་ཤོས་དེ་ལ་ཕར་རྒྱབ་ཀྱི་ཕྱུག་པོ་ཆེན་པོ་ཞིག་ལ་སྟེར་བ་ཡིན། གཉེན་ཇ་གཉེན་ཆང་བཏུངས། ངེད་རང་གི་ལུག་ནག་དེ་བསད། ཁྱོད་ཀྱི་ཤ་སྐལ་འདི་ཡིན་ཟེར་ཚི་ལུ་སྤྲད། རྒན་མོས་ཚི་ལུ་མེ་ལ་བསྲེགས་པས། ཚི་ལུ་དེས་རྒན་མོ་ཁྱོ་ཤ་ཟ་མཁན་ཁྱོད་ཟེར་བྱུང་བས། ཨ་ཙི་འདི་འདྲ་གང་ལ་ཟེར་བ་ཡིན་བྱས་པར། ཁོས་ཚིོག་ཟེར་བ་ཡིན་པས་ཟོས་ཟེར། རྒན་མོས་ཚི་ལུ་ཟོས། དེའི་སང་ཉིན་རྒད་པོས་བུ་མོ་རྒན་པ་དེ་ཁྲིད་དེ་བསད་ནས་ཟོས། ལུག་དཀར་པོ་ཆེ་བ་གཅིག་ཀྱང་བསད་ནས་བཟས། བུ་མོའི་མགོ་དེ་ཨ་ཕའི་མགོའི་ཟླ་ལ་སྟོང་ཁོག་ཡོད་པ་དེར་བཞག བུ་མོའི་ཚི་ལུ་དེ་ཨ་མ་ལ་བྱིན་ནོ། དེར་ཨ་མས་མེ་ལ་བསྲེགས་པས། ཚི་ལུས་རྒན་མོ་རང་གི་བུ་མོའི་ཤ་ཟ་མཁན་ཁྱོད་ཟེར་བྱུང་བས། འདི་འདྲ་གང་ཟེར་བ་ཡིན་བྱས་པར། ཁོས་ཚིག་ཟེར་བའི་བརྡའ་ཡིན་ཟོས་ཟེར། དེ་རིང་ལུག་དཀར་པོ་དྲག་པ་གཅིག་ཀྱང་བསད་གཉེན་ཤ་གཉེན་ཆང་བྱས། བུ་མོ་བར་མ་ཡང་སྟེར་རྒྱུ་བྱས་པ་ཡིན་ཟེར། དེའི་སང་ཉིན་བུ་མོ་བར་མ་ཁྲིད་ནས་ཕྱིན་ནོ། བུ་མོ་བར་མ་དེ་ཡང་བསད། ཡང་ལུག་ཆེ་བ་གཅིག་བསད་ནས་ཟོས། བུ་མོའི་མགོ་དེ་ཨ་ཅེའི་མགོའི་ཟླ་ལ་བཞག ལུག་རྣམས་དེད། ཚི་ལུ་ཁུར་ནས་ལོག་ཡོང་། མ་རྒན་མོ་ལུག་བསུར་ཡོང་བ་དང་ཚི་ལུ་དེ་བྱིན་ནོ། དེ་རིང་བུ་མོ་ཆུང་བ་སྟེར་རྒྱུ་བྱས་པ་ཡིན། གཉེན་ཆང་བཏུངས་གཉེན་ཤ་ཟོས། འདི་རྒན་མོའི་ཤ་སྐལ་ཡིན་ཟེར། རྒན་མོ་ན་རེ། བུ་མོ་ཆུང་བ་འདི་རང་རེ་རྒན་རྒོན་གཉིས་ཀྱི་གཡོག་ལ་ལོ་ཤས་དགོས་པ་འདུག་བྱས་པས། རྒད་པོ་ན་རེ། རང་རེ་རྒན་རྒོན་ཁམས་བཟང་རིང་ལ་བུ་མོ་རང་སོ་ཟིན་པ་དགའ་བ་ཡིན་ཟེར་རོ། དེའི་སང་ཉིན་ཨ་མ་རྒན་མོས་མར་ཟན་ཆེན་པོ་ཞིག་བརྫིས། བུ་མོ་འདི་ཆུང་ཤོས་ཡིན་པས་སྙིང་རྗེ། རྒད་པོས་འདི་འདྲ་བྱེད་པ་ཐབས་སྡུག་ལ་ཟེར་ནས་འབྲལ་མི་ཕོད་པ་ཙམ་བྱུང་རུང་། རྒད་པོ་དབང་ཆེ་བས་བུ་མོ་ཁྲིད་ནས་སོང་ངོ་། ཡང་ཁ་སང་གི་སྟོང་ཁོག་དེར་སླེབས་པ་དང་། ཁྱོད་རང་འདིར་སྡོད་ཅིག ཨ་ཕས་ཁོང་སླེབས་ཨེ་བྱུང་བལྟའོ་ཟེར་སོང་ངོ་། དུམ་པ་ཞིག་ནས་ཁྱི་གུ་ཁྲ་ཆུང་ཞིག་བུ་མོའི་རྩར་སླེབས། ཁྱི་གུ་དེས་བུ་མོས་ང་ལ་ཟན་ཁམ་གཅིག་སྟེར་ན་གཏམ་ཞིག་བཤད་ཀྱི། ཁམ་གཉིས་སྟེར་ན་གཏམ་གཉིས་བཤད་ཀྱི། ཐམས་ཅད་སྟེར་ན་ཐམས་ཅད་བཤད་ཀྱི་ཟེར་བས། བུ་མོ་དེ་ཨ་མ་དང་བྲལ་བའི་སེམས་ཁྲལ་གྱིས་སྐྱོ་སྣང་སྐྱེས་ནས་ཟ་མ་འདོད་པར་ཐམས་ཅད་བྱིན་པས། དེར་ཁྱི་གུས་ཁྱོད་ཀྱི་ད་ལྟའི་ཨ་ཕ་ནི་རང་གི་ཕ་དེ་མིན་པ་སྲིན་པོ་ཡིན། ཁྱོད་ཀྱི་ཨ་ཕའི་མགོ་དང་ཨ་ཅེ་གཉིས་ཀྱི་མགོ་རྣམས་ཁུག་ཡ་ན་ཡོད་དོ་བསྟན་གྱི་ཟེར་ནས་ཁྱི་གུས་ཁྲིད་དེ་བསྟན་ནོ། དེར་མགོ་རྣམས་མཐོང་ནས་བུ་མོ་སྐྲག་སྟེ། ཁྱོད་ཀྱིས་ངའི་སྲོག་སྐྱོབ་པའི་ཐབས་ཨེ་ཡོད་བྱས་པས། ཁྱི་གུ་ན་རེ། ཁྱེད་སྙིང་རྗེ་བ་འདུག་པས་ངས་ཁྱོད་ལ་ཐབས་ཤིག་སྟོན་ནོ་ཟེར། ཁྱོད་ཀྱིས་སླ་ང་ཞིག་ལག་ཏུ་ཁྱེར་ནས་ལ་ཡ་གིའི་ལྡེབས་ལ་བྲོས་ཤིག བུ་མོ། ཨ་ཕ་འདི་ན་ཡོད་ཟེར་ཀྱང་བྲོས་ཤིག ལ་ཁ་ན་ཡར་ཟིན་ལ་ཁད་བྱུང་བ་དང་། ཕྱི་མིག་མ་བལྟས་པར་སླ་ང་འདི་སྒྲིལ་ལ་སླ་ངའི་རྗེས་སུ་ངའི་སླ་ང་ངའི་སླ་ང་ཟེར་སླ་ངའི་རྗེས་སུ་དྲིལ་ཞིག སླ་ང་ག་འགྲོར་དྲིལ་ཕྱིན་པ་དང་བུ་མོའི་ཚེ་ཐར་བར་འགྱུར་ཟེར་མི་སྣང་བར་སོང་ངོ་། བུ་མོས་དེ་བཞིན་སླ་ང་ཁུར་ནས་བྲོས་པ་དང་སྲིན་པོ་དེ་བུ་མོའི་རྗེས་སུ་བརྒྱུགས་ཡོང་ནས། བུ་མོ། ཨ་ཕ་འདི་ན་ཡོད་གར་འགྲོ་ཟེར་བརྒྱུགས་བྱུང་བ་དང་། ཕྱི་མིག་མ་བལྟས་པར་བྲོས། ལ་ཁ་དེ་ན་ཁོས་ཟིན་ལ་ཁད་བྱུང་བ་དང་། སླ་ང་དེ་དྲིལ་ནས་དེའི་རྗེས་ལ་ངའི་སླ་ང་ངའི་སླ་ང་ཟེར་དྲིལ་ཕྱིན་པས་སླ་ང་དེ་ལྕི་བའི་ཕད་སྒྱེ་ཞིག་གི་འོག་ལ་འཛུལ་སོང་ངོ་། མོས་ཀྱང་དེའི་འོག་ལ་འཛུལ་ཕྱིན་པས་ཤིང་གི་སྒོ་ཞིག་འདུག་པ་དེ་ཕྱེ་ནས་ཕྱིན། ལྕགས་ཀྱི་སྒོ་ཞིག་དང་ཐུག་དེ་ཕྱེ་བའི་ནང་ན་རིན་པོ་ཆེ་གསེར་གྱི་སྒོ་ཞིག་འདུག་སྟེ། དེ་ཕྱེ་བའི་ནང་ན་སྐས་འཛེགས་ཤིག་ཡོད་ཅིང་། དེར་འཛེགས་ཕྱིན་པས་བྱ་ཕོ་ཞིག་གདང་ཁ་ན་བསྡད་འདུག་པས། དེས་ཨོ་ ཨོ་བུ་མོ་བྱོན་ལགས་སམ་ཟེར། མོས་ལ་ཡོད་བྱས་པ་དང་། བུ་མོ་འོ་བརྒྱལ་ཡོད་པས་ནང་ནས་ཤ་མར་ལོང་ལས་ཟོ་ཟེར། མོས་རྒྱགས་ཚད་ཟོས། དེར་ཞག་གཅིག་སོང་བ་དང་། བྱ་ཕོ་དེས་བུ་མོར་སྨྲས་པ། བུ་མོ། མཛོད་ཀྱི་ཕུག་ཡ་གི་ན་གོས་ལྷམ་རྣམས་ཡོད། དེ་གྱོན་ནས་ལུང་པའི་མདའ་ན་ལྟད་མོ་ཆེན་པོ་ཞིག་ཡོད་པས་བལྟ་བར་རྒྱུགས་ཟེར་རོ། བུ་མོ་ དེས་མཛོད་ནང་ཕྱིན། མོ་རང་ལ་རན་པའི་གོས་ལྷམ་རྣམས་གྱོན། རྒྱན་ཆ་ལུགས་རྣམས་བཏགས་ནས་ལྟད་མོ་ལ་ཕྱིན་ནོ། བུ་མོ་སོང་བའི་རྗེས་ལ་ཁོས་ར་བ་མུན་ནག་ཞིག་ནས་རྟ་བཟང་པོ་ཞིག་བཏོན། བྱ་ཤུབས་དེ་བསྒྲིལ་ནས་གདུང་མའི་སྲུབ་ཏུ་བཅུག་རྒྱན་ཆ་ལུགས་རྣམས་ལེགས་པར་སྤྲས། རྟ་ཕོ་དེ་ལ་བཞོན་ནས་ཁོ་ཡང་ལུང་པའི་མདར་ལྟད་མོ་ལ་ཕྱིན་ནོ། དེར་ཁོས་གཡས་སྐོར་ཞིག་བརྒྱབ་པས་བུ་མོ་དེ་ལས་སྙིང་རྗེ་བ་མ་མཐོང་། གཡོན་སྐོར་ཞིིག་བརྒྱབ་ཀྱང་བུ་མོ་དེ་ལས་ལེགས་པ་མ་མཐོང་། མོས་ཀྱང་གཡས་སྐོར་ཞིག་བྱས་པས་ཁོ་ལས་ལེགས་པ་མ་མཐོང་། གཡོན་སྐོར་ཞིག་བརྒྱབ་ཀྱང་ཁོ་ལས་མཚར་བ་མ་མཐོང་། ལྟད་མོ་འགྲེས་གྲབས་ཡོད་དུས་ཁོས་བུ་རམ་གལ་ཏ་གང་དང་ཐལ་བ་གལ་ཏ་གང་ཡོད་པ་གཏོར་བས་ལ་ལས་བུ་རམ་སྒྲུག ལ་ལ་ཐལ་བས་མིག་འགགས་པའི་སྐབས་དང་བསྟུན་ནས་ཁོས་རྟ་ལ་ལྕག་གིས་སྐུལ་བས་དེ་མ་ཐག་ལུང་པའི་ཕུ་རུ་སླེབས། དེར་རྟ་སྒ་བཤུས་ནས་ར་བ་མུན་ནག་དེར་བཏགས། སྒ་དང་རྒྱན་ཆ་ལུགས་རྣམས་སྦས། སྔར་བཞིན་གདང་ཁར་བསྡད་ཡོད་ཙ་ན། བུ་མོ་དེ་སླེབས་བྱུང་སྟེ། ཨོ་ཨོ་བུ་མོ་ཕྱག་ཕེབས་སམ་བྱས་པ་དང་། བུ་མོས་ལ་ཡོད། ཚ་བོ་ཉི་མ་རིང་པོ་མ་བྱུང་ངམ་བྱས་པ་དང་། ཁོས་ཕོ་ཁྱུའི་ནང་ནས་རྡོག་ཏུ་ཐོན་པ་དེ་སུ་རེད། མོ་ཁྱུའི་ནང་ནས་རྡོག་ཏུ་ཐོན་པ་དེ་སུ་རེད་ཅེས་དྲིས་པས། མོ་ན་རེ། སྐྱེས་པ་ཕོ་ཡི་ནང་ནས་རྡོག་ཏུ་ཐོན་པ་དེ་ལུང་པའི་ཕུ་ན་བྱ་ཕོ་ཚ་ལུ་ཟེར་བ་ཞིག་འདུག མོ་ཁྱུའི་ནང་ནས་རྡོག་ཏུ་ཐོན་པ་མང་པོ་འདུག་བྱས་པ་དང་། བྱ་ཕོས་བུ་མོ་ཁྱོད་ལྟོགས་ཡོད་ཀྱི་ཤ་མར་ཟོ་ཟེར་རོ། མོ་རང་གིས་ཟས་བྱ་ཕོ་ལ་ཡང་དྲངས་སོ། ཡང་ཞག་འགའ་ཞིག་སོང་བ་དང་། བྱ་ཕོས། བུ་མོ། དེ་རིང་ཡང་ཁ་སང་གི་ཤུལ་ན་ལྟད་མོ་ཡོད་པས་ཕྱིན་པ་དྲག་གོ་ཟེར། དེར་བུ་མོས་རྒྱན་ཆ་ལུགས་རྣམས་སྤྲས་ནས་ལྟད་མོར་ཕྱིན། ཁོས་ཀྱང་སྔར་ལྟར་རྒྱན་ཆ་ལུགས་རྣམས་སྤྲས་ནས་ཕྱིན་པ་ཡིན་འདུག ཁོས་ཁྲོམ་དམངས་ཀྱི་དཀྱིལ་ནས་མོ་ལས་སྙིང་རྗེ་བ་དང་ཡིད་དུ་འོང་བ་མ་མཐོང་། མོས་ཀྱང་ཁོ་ལས་མཚར་བ་མ་མཐོང་། ཁྲོམ་དམངས་རྣམས་ན་རེ། བྱ་ཕོ་ཚ་ལུ་འདི་མཚར་དྲག་པས་བཙན་གྱིས་ཁྱེར་བ་ཡིན་ཏེ། བུ་མོ་འདི་ཡང་མཚར་བ་ཞིག་འདུག་ཟེར་རོ། ཁོས་ཡང་བུ་རམ་དང་ཐལ་བ་རྣམས་གནམ་ལ་གཏོར་བས་ལ་ལ་ནི་བུ་རམ་སྒྲུག་པར་མིག་ཡེངས། ལ་ལ་ནི་ཐལ་བས་མིག་ཁེངས་ནས་འདུག་པའི་བར་ལ་ཁོ་ལུང་པའི་ཕུར་སླེབས། ཡང་རྟ་དང་གོས་རྣམས་སྦས། བྱ་ཤུབས་གྱོན་ནས་གདང་གི་སྟེང་དུ་བསྡད་དོ། བུ་མོ་དེར་སླེབས་པ་དང་ཁོས། བུ་མོ་ཕྱག་ཕེབས་སམ། ལྟད་མོ་ཆེན་པོ་བྱུང་ངམ། ཕོ་ཁྱུའི་ནང་ནས་རྡོག་ཏུ་ཐོན་པ་དེ་སུ་རེད། མོ་ཁྱུའི་ནང་ནས་རྡོག་ཏུ་ཐོན་པ་དེ་སུ་རེད་ཅེས་དྲིས་པས་བུ་མོས། སྐྱེས་པ་ཕོ་ཡི་ནང་ནས་རྡོག་ཏུ་ཐོན་པ་དེ་ལུང་པའི་ཕུ་ན་ཡོད་པའི་བྱ་ཕོ་ཚ་ལུ་ཟེར་བ་ཞིག་འདུག བུད་མེད་ཀྱི་ནང་ནས་རྡོག་ཏུ་ཐོན་པ་མང་པོ་འདུག་བྱས་པ་དང་། ཡང་ལག་མཛོད་ནས་ཟ་ཆས་བཏོན་ཏེ་བྱ་ཕོ་ལ་ཡང་དྲངས། བུ་མོ་རང་གིས་ཀྱང་བཟས། ཡང་སྐབས་ཤིག་ཙ་ན། བྱ་ཕོ་ན་རེ། དེ་རིང་ཡང་ལུང་པའི་མདའ་ན་ལྟད་མོ་ཡོད་པས་ཁྱོད་ཕྱིན་ན་དྲག་ཟེར་རོ། བུ་མོས་ཆ་ལུགས་རྣམས་སྤྲས་ནས་འགྲོ་གྲབས་བྱེད་སྐབས་བསམ་བློ་ཞིག་འཁོར་བར། ལུང་པའི་ཕུའི་བྱ་ཕོ་ཚ་ལུ་ཟེར་བ་དེ་འདི་ཨེ་ཡིན་བསམས་ནས་བུ་མོས་ཁུག་ཀྱོག་ཅིག་ཏུ་ཡིབས་བསྡད་དོ། དེར་ཁོས་རྒྱན་ཆ་ལུགས་རྣམས་སྤྲས་ནས་བྱ་ཤུབས་དེ་གདུང་མའི་སྲུབ་ཏུ་བཅུག་ནས་ཕྱིན་ནོ། ཁྲོམ་དེར་གཡས་སྐོར་ཞིག་བརྒྱབ་པས་བུ་མོ་དེ་མ་མཐོང་། གཡོན་སྐོར་ཞིག་བྱས་ཀྱང་བུ་མོ་དེ་མ་མཐོང་། བུ་མོས་བུ་ཁོ་སོང་རིང་དུ་བྱ་ཤུབས་དེ་བཏོན་ནས་མེ་ཀོང་ཞིག་བཏང་སྟེ་བསྲེགས། བུ་དེ་སྔར་བཞིན་བུ་རམ་དང་ཐལ་བ་གཏོེར་ནས་བརྒྱུགས་ཡོང་སྟེ་ནང་དུ་སླེབས་པ་དང་། བུ་མོས་བྱ་ཤུབས་བསྲེགས་ནས་མི་འདུག་གོ། དེར་ཁོས། བུ་མོ་འུ་ཅག་གཉིས་ལ་འགྲོགས་བསྐལ་དེ་ལས་མེད་པ་ཡིན་པར་འདུག ངའི་བྱ་ཤུབས་དེ་ལོ་བཅུ་ཙམ་མ་བསྲེགས་ན་ངེད་རང་གཉིས་མཉམ་དུ་བསྡད་རྒྱུ་ཡོང་བ་ཡོད་བྱས་པ་དང་། བུ་མོས་ངུས་ཏེ་ཐབས་ཤེས་གང་ཡོད་བྱས་པར། ད་ཐབས་དང་རྟེན་འབྲེལ་མེད་དོ་ཟེར་རོ། བུ་མོས་བུ་ལ་བཅངས་ནས་ད་དུང་ཐབས་དང་རྟེན་འབྲེལ་མེད་དམ་ཟེར་ནས་ངུས་པས། ཁོ་ན་རེ། ཁྱོད་རང་ལུང་པ་མ་གིའི་མདའ་ན་སྤང་བད་ཡོད་པའི་དུད་ཚང་ཁ་ཤར་ལ་བལྟས་པ་ཞིག་ཡོད། དེར་ངའི་ཡི་དམ་རྟ་མགྲིན་ཁུར་ནས་རྒྱུགས། ཁྱོད་ལ་ངའི་ལུས་པོ་འདི་ཡོད་པའི་ཡོན་ཏན་གྱིས་གཉེན་ལ་ངའི་ཁྱིས་བསུ་བར་བྱེད་པ། དགྲ་ལ་རྨུག་པར་བྱེད་པ་ཞིག་ཡོད་དེ། དེ་ནས་ར་བ་གཅིག་གི་ནང་ན་ངའི་ཨ་མ་རྒན་མོ་དེ་ཡོད། དེ་ལངས་ནས་ཁྱོད་བསུ་བར་ཡོང་། རང་གི་སྐྱེ་རྒྱུས་རྣམས་བཤད་ནས་ཁྱོད་རང་དེར་སྡོད་ཅིག ང་དང་ཁྱོད་གཉིས་ད་འཕྲད་པར་དཀའ་བྱས་པ་དང་། བུ་མོ་ལུང་པའི་མདར་ཕྱིན་ནས་ཁོས་ཇི་ལྟར་ཟེར་བ་བཞིན་ཁང་པ་དེར་ཕྱིན་པ་དང་། ཁོང་རང་གི་ཨ་མ་རྒན་མོ་དེས་མཐོང་ནས། ལམ་ཡ་ནས་མི་གཞན་ཞིག་སླེབས་བྱུང་ཟེར། བུ་མོས་ཁྱི་གཉིས་བོས་ནས་ང་དགྲ་ཡིན་ན་རྨུག་པར་ཤོག གཉེན་ཡིན་ན་བསུ་བར་ཤོག་ཟེར་སྐད་བརྒྱབ་པ་དང་། ཁྱི་གཉིས་བརྒྱུགས་ནས་མོ་ལ་མཇུག་མ་ཧྲིལ་ཧྲིལ་བྱེད་པ་ལས་མི་རྨུག་པ་ཨ་མས་མཐོང་འཕྲལ་ཡར་ལངས་ནས་བསུ་བར་ཡོང་། ཨ་མ་རྒན་མོས་བུ་མོ་བྱོན་ནམ་བྱས་པ་དང་། བུ་མོས་ཨ་མ་ལགས་བཞུགས་སམ་བྱས། དེར་ཨ་མས་ཁྱེད་གང་ནས་བྱོན་པ་ཡིན་བྱས་པར། བུ་མོ་ན་རེ། བདག་ནི་ཡུལ་བུད་ནས་ལྟོ་སློང་བར་འགྲོ་མཁན་ཞིག་ཡིན་བྱས་པས། རྒན་མོས་བུ་མོ་ནང་དུ་ཁྲིད་ནས་ཟས་ཤིག་དྲངས་པ་དང་། བུ་མོའི་ཁ་ནས་ཧ་ཡུ་ཟེར་བའི་དབུགས་རིང་ཞིག་ཤོར་བས། ཨ་མ་རྒན་མོ་ན་རེ། བུ་མོ་ཁྱེད་ལ་སེམས་ནད་ཆེན་པོ་ཞིག་འདུག ང་ལ་སྙིང་ནས་བརྩེ་བའི་བུ་ཞིག་ཡོད་པ་དེ་གར་སོང་འདིར་སོང་རྩད་མ་ཆོད་པར་ལོ་ལྔ་ཙམ་སོང་། སེམས་ནད་འདི་ལས་ཆེ་བ་གང་དུ་ཡོད། བུ་མོ་ཁྱོད་ལ་ཅི་བྱུང་དྲིས་པ་དང་། བུ་མོ་དེ་མཆི་མ་རང་དབང་མེད་པར་ཤོར་ཏེ། བདག་གི་བསོད་བདེ་དམན་པས་ཕ་མ་ཨ་ཅེ་རྣམས་སྲིན་པོས་བཟས། ང་རང་ཐར་ཙམ་བྱུང་བྱས་པ་དང་། རྒན་མོས་ཁྱོད་བདེན་ཟེར་མོ་རང་ཡང་མཆི་མ་བཏང་། ངའི་གཅེས་ཕྲུག་གི་རོ་མིག་གིས་མ་མཐོང་བར་ལོ་ལྔ་སོང་། བུ་མོ་ཁྱོད་ཀྱང་ཡ་ང་བ་ཞིག་འདུག་པས་རྒན་མོ་ངའི་སར་སྡོད་ཅིག་ཟེར་ནས་ཐགས་དང་བལ་ལས་བྱེད་བཅུག བུ་མོ་དེ་ཁང་ཆུང་ཞིག་ཏུ་བསྡད། དེར་དུས་གང་ཙམ་སོང་རྗེས་ཉིན་གཅིག་གི་མཚན་མོའི་རྨི་ལམ་ལ། བུ་མོའི་སྔས་མགོར་དྲང་སྲོང་ཞིག་ཡོང་སྟེ་ཁྱོད་ནི་ཕ་མ་སྤུན་མཆེད་མེད་པའི་བུ་མོ་ཡ་ང་བ་ཞིག་འདུག་པས་ཁྱོད་ཀྱི་བསམ་དོན་བསྒྲུབ་དགོས་པ་གང་ཡོད་ང་ལ་ཤོད་ཅིག་བྱས་པ་དང་། བུ་མོས་བདག་ལ་བློ་གཏད་བཅོལ་སའི་ཕ་མ་སྤུན་ཉེ་གང་ཡང་མེད། གཏན་གྲོགས་བྱ་ཕོ་ཚ་ལུ་ཟེར་བ་ཞིག་ཡོད་པས་དེ་དང་མྱུར་དུ་འགྲོགས་རྒྱུ་ཡོང་བའི་སྐྱབས་རོགས་ཞུ་ཞུས་པས། གྲོགས་དང་འཕྲད་པ་ང་ཡིས་བྱེད་གསུངས་ནས་ཡལ་བ་རྨིས། བུ་མོ་དེར་སླེབས་ནས་ཟླ་བ་ཁ་ཤས་སོང་བ་དང་གཟུགས་པོ་འཁོར་བའི་མངོན་ཚུལ་ཞིག་བྱུང་སྟེ་གཡོག་མོ་གཞན་རྣམས་ཆགས་སྡང་ལངས་ནས་རྒན་མོ་ལ་ཞུས་པ། རང་རེའི་ཁྱིམ་དུ་ཡོད་པའི་བུ་མོ་འདི་ལ་གཟུགས་པོ་འཁོར་ཡོད་པ་འདྲ་ཟེར་རོ། ཨ་མ་རྒན་མོས་གཏམ་དེ་ཚོར་ནས་བུ་མོ་དེར་སྨྲས་པ། ཁྱོད་ལ་གཟུགས་པོ་འཁོར་ཡོད་པ་འདྲ། ངེད་ཀྱི་རྟ་རྫི་ལུག་རྫི་སུའི་ཡིན་ཤོད་ཅིག ངེད་གཉིས་པོ་རང་ལས་མ་ཤེས་པ་བྱ་ཆོག་ཟེར། བུ་མིས་སྨྲས་པ། ལྷ་བཟང་པོ་ཞིག་རང་ཡོད་པར་གདའ། ཁ་སང་ནས་སྤང་བད་གསོ་བ་སོགས་རྨི་ལྟས་བཟང་པོ་མང་པོ་བྱུང་། ང་ལ་དོགས་པ་ཡོད་ན་རྟ་རྫི་ལུག་རྫི་ལ་དྲིས་པས་གསལ། ཕྱི་མིས་ཟེར་ཚད་མི་བདེན་ལགས། ངའི་འདི་ནད་གཞི་ཕོག་པའི་རྐྱེན་གྱིས་ཡིན་ཟེར་བས། རྒན་མོ་ལོག་ཕྱིན། དེ་ནས་འགའ་ཞིག་སོང་བ་དང་། མོའི་ཤར་སྒོའི་དྲུང་དུ་མི་དམར་རྟ་དམར་བཞོན་པ་ཁྱི་དམར་རོལ་དུ་ཁྲིད་པ་ཞིག་བྱུང་ནས། བུ་མོ་ཁྱོད་སླ་ང་སླང་ཆུང་མ་ཡིན་ལགས་སམ། ། མལ་ས་ཁྲི་སྟན་བྱས་ལགས་སམ། ། སྔས་ལ་སྔས་འབོལ་བཅུག་ལགས་སམ། ། སྟེང་དུ་བལ་ཐུལ་གྱོན་ལགས་སམ། ། སྔས་མགོར་བུར་ཆུ་བཞག་ལགས་སམ། ། ལྟོ་རུ་ཕྱེ་མར་བྱིན་ལགས་སམ། ། བྱས་པ་དང་། མོས་སྨྲས་པ། ཚ་བོ་བྱ་ཕོ་ཚ་ལུ་བྱོན་ལགས་སམ། ། མལ་ལ་ཁྲི་སྟན་མ་བྱས་ལགས། ། མལ་ས་ཁང་ཆུང་ནང་དུ་ཡོད། ། སྔས་ལ་སྔས་འབོལ་མ་བྱས་ལགས། ། སྐེ་རགས་སྔས་ལ་བརྒྱབ་ནས་ཡོད། ། སྟེང་དུ་བལ་ཐུལ་མ་གྱོན་ལགས། ། ཉིན་གོས་མཚན་གོས་གཅིག་ལས་མེད། ། གདན་ལ་འབོལ་གདན་མ་བཏིངས་ལགས། ། དོར་མ་གདན་ལ་བཏིངས་ནས་ཡོད། ། བྱས་པ་དང་། ཁོང་ནང་དུ་སླེབས་བྱུང་སྟེ་ཁོང་གཉིས་གླེང་མོ་བྱས། མོས་ཁྱེད་ད་དུང་འདིར་ལོག་མི་འབྱོན་པ་ཅི་ཡིན་བྱས་པར། ཁོས་ང་ག་ནས་ཡོང་རྒྱུ་ཡོང་། ཁྱེད་ཀྱིས་བྱ་ཤུབས་དེ་མེ་ལ་བསྲེགས་པས་ང་བཙན་གྱིས་ཁྱེར་བ་ཡིན་ནོ་ཟེར། ད་རེས་འདིར་བྱོན་ཆོག་པ་ཅི་ཡིན་བྱས་པས། ང་འདི་ནས་ཁྱེར་འཕྲལ་ལ་ནི་ཁ་ལོ་མཚར་བས་ཇ་ཞུ་བར་བཞག དེ་ནས་རྩི་མཐོང་ཆེ་རུ་ཕྱིན་ནས་གཟིམ་དཔོན་ལ་བཞག ཁ་སང་ཁ་ཉིན་གཟིམ་ཆང་ལན་རེ་གཉིས་ཆད་པར་ཅང་མི་གསུངས་པ་ཡིན་ཏེ་ཁ་ནུབ་གཟིམ་ཆང་ཆད་པས་ཐུགས་ཁྲོས་ཏེ་གཟིམ་དཔོན་ནས་བཏོན་ཏེ་རྟ་རྫི་ལ་བཞག་བྱུང་བས་ཡོང་རྒྱུ་བྱུང་བ་ཡིན། ད་སྐབས་སྐབས་སུ་ཐུག་རྒྱུ་ཡོང་བ་འདུག་ཟེར། བུ་མོ་ན་རེ། འཕྲད་རྒྱུ་ལས་ལོག་རྒྱུ་འདྲ་ཡོང་བ་མི་འདུག་གམ་ཟེར་བས། ལོག་རྒྱུ་ཨེ་ཡོང་མི་ཤེས། ཁྱེད་རང་གིས་ངའི་ཨ་མར་སྐྱེ་རྒྱུས་དང་ལོ་རྒྱུས་བཤད་ན་འོག་ཏུ་འདིང་བའི་གདན་དང་། སྟེང་དུ་གྱོན་པའི་མལ་ཆས། དེ་མིན་ཟས་གོས་སོགས་ཀྱང་འདི་ལས་དྲག་པ་ཡོང་ཟེར། དེ་ནས་ནམ་ཐོ་རེངས་ཁར་སླེབས་དུས་ང་འགྲོ་རན་སོང་ཟེར་སོང་ངོ་། བུ་མོ་དེའི་བསམ་པ་ལ་བདག་གི་རྨི་ལྟས་བཟང་པོ་དེ་སྨིན་པ་ཡིན་བསམས་ནས་དགའ་ཚོར་ཆེན་པོ་བསྐྱེད་དོ། དེའི་ཕྱི་ཉིན་རྟ་རྫི་དང་གཡོག་རྣམས་ཀྱིས་དཔོན་མོ་ལ་ཞུས་པ། ངེད་ཚོར་ཁྱེད་ཀྱིས་དོན་མེད་བཀའ་བཀྱོན་གནང་། བུ་མོ་འདི་ལ་གཟུགས་འཁོར་བ་ལས་འོས་མི་འདུག མཚན་ལ་མོའི་ཁང་པར་གླུ་ཕར་ལེན་ཚུར་ལེན་དང་ཁུ་དིར་དིར་ཞིག་འདུག་རང་འདུག་ཞུས་པས། ཨ་མ་དེས་བུ་མོའི་རྩར་ཕྱིན་ནས་བུ་མོ་ཁྱོད་ནམ་སྨད་ལ་གླུ་དང་ཁུ་དེ་རིར་འདུག་ཟེར་ཏེ་ང་ལ་མ་གསང་དྲང་པོར་ཤོད་དང་བྱས་པས། ངའི་སར་གླུ་ལེན་པར་ཡོང་མཁན་མེད་ལགས་ཞུས། རྒན་མོས་ཅི་ནས་ཀྱང་ཡོད་པ་འདུག་པས་ཤོད་ཅིག་བྱས་པར། བུ་མོས། ཚེ་སྔོན་བསོད་ནམས་བསགས་པའི་མཐུ་ཡིས་གཏན་གྲོགས་ཤིག་དང་ཐུག ལན་གཅིག་བྱ་ཐབས་ནོར་བས་སྡུག་པོ་འདི་བྱུང་བ་ཡིན་བྱས་པས། རྒན་མོས་དུམ་པ་རྫི་རིག་ནས་འོག་ཏུ་ཁྲི་བརྒྱབ། ཁྲི་ཁར་འབོལ་བཏིངས། སྟེང་དུ་བལ་ཐུལ་གཡོགས། སྔས་ལ་འབོལ་སྔས་བཅུག སྔས་མགོར་བུར་ཆུ་སླུ་གུ་གང་བཞག ལྟོ་ལ་ཕྱེ་མར་རིལ་བུ་བྱིན། ཡང་ནུབ་ཅིག་ལ། ཁ་སང་འོང་ནས་ཇི་ལྟར་ཟེར་བ་ལྟར་བྱུང་བར་མོས་སྨྲས་པ། ཉལ་ས་ཁྲི་གདན་བྱས་ནས་ཡོད། ། སྔས་ལ་འབོལ་སྔས་བཅུག་ནས་ཡོད། ། སྟེང་ན་བལ་ཐུལ་གྱོན་ནས་ཡོད། ། སྔས་མགོར་བུར་ཆུ་བླུགས་ནས་ཡོད། ། ལྟོ་ལ་ཕྱེ་མར་བྱིན་ནས་ཡོད། ། བྱས་པ་དང་། ཁོ་ནང་དུ་ཡོང་ནས་སྒོ་བཅད་དེ་འཕྲད་རྒྱུ་ཡོང་བ་འདུག་ཟེར། བུར་ཆུ་སླུ་གུ་གང་པོ་བཏུངས། ཕྱེ་མར་རིལ་བུ་དེ་ནས་བཟས། ད་མི་ཟས་ཟ་རྒྱུ་ཡོང་བ་འདུག་ཟེར་ཁོ་དགའོ། ཁ་སང་འདིར་ཡོང་བས་བཀའ་བཀྱོན་ཕོག་སྟེ་རྟ་རྫི་ནས་ཕུད་དེ་ཆུ་ལེན་བྱེད་ཀྱི་ཡོད་ཟེར། བྲོས་ན་ཐར་བ་མི་འདུག་གམ་བྱས་པས། བཙན་རྟ་བཞོན་མི་དེ་སྐྱེན་པས་དེའི་ལག་ནས་ག་ནས་ཐར། འོན་ཏེ་བསུ་མཁན་ཞིག་བྱུང་ན་ཐར་བ་འདུག་ཟེར་བས། བུ་མོ་དེ་དགའ་སྤྲོ་ཤིན་ཏུ་ཆེན་པོ་སྐྱེས་སོ། དེའི་མཚན་མོར་བུ་མོའི་རྨི་ལམ་ལ་སྔར་གྱི་དྲང་སྲོང་དེ་མདུན་དུ་ཡོང་ནས། བུ་མོ་ཁྱོད་སྙིང་རྗེ་བ་འདུག་པས་སང་ཉི་མ་ཕྱེད་ཡོལ་གྱི་སྐབས་སུ་ཤྭ་རུ་ལག་ཏུ་བཟུང་ནས་ཤུག་ཕུང་ཕ་གིའི་དཀྱིལ་དུ་སྡོད། ཁ་རུ་གཡུ་ཆུང་དེ་ཆུག་ལ་ཡེ་མ་ཤོར་བ་དང་། ལག་པས་ཤྭ་རུ་མ་ཤོར་བ་བྱས་ནས་ང་སྤྱི་གཙུག་ཏུ་བསྒོམས་ལ་སྡོད་ཅིག སྐབས་དེར་གཡས་ན་རྟ་པ་དམར་པོ་བརྒྱ་ཙམ། གཡོན་ན་རྟ་པ་དམར་པོོ་སྟོང་ཙམ་ཤར་ཡོང་ངོ་། མི་དམར་པོ་ཆེ་ཆུང་རི་རབ་ཙམ་ལ་སྡིག་པའི་མགོ་བྱས་པ་ཞིག་ཡོང་ནས། ཁང་པ་བརླ་དབྲག་ཏུ་བཅུག་སྟེ་བརྡབས་བྱུང་ཡང་ང་སྤྱི་གཙུག་ཏུ་བསྒོམས་ནས་སྡོད་ཅིག ཁྱོད་ཀྱི་བསམ་དོན་དེ་རིང་འགྲུབ་པ་ཡོད་དོ་ཟེར་བ་རྨིས། དེའི་ཕྱི་ཉིན་ཉི་མ་ཕྱེད་ཡོལ་ཙམ་དུ་བུ་མོ་དེས་ཁའི་ནང་གཡུ་ཆུང་དེ་བཅུག ཤྭ་རུ་ལག་ཏུ་ཁྱེར། དྲང་སྲོང་སྤྱི་གཙུག་ཏུ་བསྒོམས་ནས་བསྡད། དྲང་སྲོང་དེ་རྟ་སྔོན་གཅིག་ཏུ་སྤྲུལ་ནས་ཆུ་མིག་གི་ཁར་བསྡད་པས། བུ་དེ་རྒྱབ་ཏུ་ཟངས་བུམ་ཞིག་ཁྱེར་ནས་སྐྱོ་གླུ་ཞེན་བཞིན་དུ་ཆུ་ལེན་པར་ཡོང་། ཆུ་མིག་ཁར་སླེབས་པ་དང་། རྟ་མཆོག་དེས་སྨྲས་པ། བུ་ཁྱོད་སྙིང་རེ་རྗེ། ཁྱོད་ཀྱི་གཏན་གྲོགས་ནམ་ཉིན་བསྟུད་ནས་སྒུག་བསྡད་འདུག་པས་ཁྱོད་རྟ་མཆོག་ང་ལ་བཞོན་ནས་ཕྱི་མིག་མ་བལྟས་པར་རང་ཡུལ་དུ་ལོག་ཅིག་བྱས་པ་དང་། ཁོ་དགའ་སྤྲོ་དཔག་མེད་སྐྱེས་ནས་རྟ་ལ་བཞོན་ཏེ་ཡུད་ཙམ་ཞིག་ལ་རང་ཡུལ་དུ་སླེབས། སྐབས་དེར་བཙན་གྱི་ཡུལ་ནས་བཏང་བའི་རྟ་པ་མང་པོ་ཞིག་གིས་ཁོའི་ཡུལ་བཀང་འདུག་ཅིང་། མི་དམར་པོ་ཆེ་ཆུང་རི་རབ་ཙམ་ལ་སྡིག་པའི་མགོ་བོ་ཡོད་པ་ཞིག་གིས་ཁོའི་ས་མཁར་དེ་རྭ་རྩེར་བླངས་ནས་སྐབས་རེ་གནམ་ལ་སྟེགས། སྐབས་རེ་ས་ལ་བརྡབས་ཀྱང་། བུ་མོ་སྐྲག་སྣང་མ་སྐྱེས་པར་བུ་མོས་སྡིག་པའི་མགོ་ཅན་དེ་ལ་སྨྲས་པ། ལག་ངན་སྡིག་པའི་མགོ་ཅན་ཁྱོད། ཕྱི་མ་དམྱལ་བའི་གཏིང་རྡོ་ཁྱོད་བྱས་པས། དེ་དག་ཐམས་ཅད་མི་སྣང་བར་གྱུར། ཡུལ་མི་རྣམས་ཀྱིས་གཞན་ནི་མ་མཐོང་། བུ་མོ་ཤྭ་རུ་བཟུང་ནས་ཤུག་ཕུང་གི་མདུན་ན་བསྡད་པ་མཐོང་། དཔོན་མོ་ལགས། བུ་མོ་འདི་ལ་ལབ་གླེང་བྱེད་མཁན་ཞིག་འདུག ད་གིན་ནས་ཁང་པ་འགུལ་བྱུང་བས་མོས་དཀྲུགས་པ་ཡིན་འདུག རང་རེ་ཚོ་བྲོས་པས་ནི་ཐར་ས་མེད། ཁྱོད་ཀྱི་གཅེས་ཕྲུག་དེ་ཁྱེར་མཁན་ཡང་འདི་ཡིན་པ་འདྲ་ཟེར། བུ་མོ་སྟེང་ནས་མར་བབས་ཡོང་བ་དང་གཏན་གྲོགས་བྱ་ཕོ་ཚ་ལུ་ནང་ན་རྒྱངས་ཏེ་བྱོན་པ་འཛོམས་པས་ཁོང་གཉིས་ཀ་བསམ་དོན་གྲུབ་པའི་དགའ་ཚོར་གྱིས་ཡུད་ཙམ་རིང་གཅིག་གིས་གཅིག་ལ་འཐམས་ནས་བསྡད་དོ། སྐབས་དེར་ཨ་མ་རྒན་མོ་བུ་ལ་འཐམས་ནས་ཡུད་ཙམ་རིང་བརྒྱལ་ལོ། བུ་ནང་དུ་བྱོན་པ་མཐོང་བའི་ནང་མི་རྣམས་མདོར་ཕྱིན་ནས་སྐད་བརྒྱབ་པས་མི་བྱིངས་རྣམས་ཀྱང་དེར་འཛོམས་ནས་དགའ་དགའ་སྤྲོ་སྤྲོ་བྱས་སོ། དེར་འདུས་པའི་མི་ཡོད་ཚད་ཀྱིས་བུ་ཕེབས་པས་ལྷ་གསོལ་བསམ་གྱིས་མི་ཁྱབ་པ་བྱས། དེ་ནས་རིམ་བཞིན་བུ་མོ་དེ་ལ་བུ་གསུམ་དང་བུ་མོ་གསུམ་སྐྱེས། ཡུལ་དེར་རྒྱལ་པོ་ཆེན་པོ་ཞིག་ཡོད་པ་དེའི་རྒྱལ་རྒྱུད་ཆད་ནས་དེའི་རྒྱལ་སྲིད་ཀུན་ཁོང་གཉིས་ནས་བཟུང་། རྒྱལ་འབངས་རྣམས་ཀྱང་སྔར་ལས་བདེ་སྐྱིད་ཆེ་བ་བྱུང་བ་ཡིན་པ་འདུག་བྱས་པ་དང་། རྒྱལ་བུའི་ཁ་ནས་བུ་དེ་སྙིང་རུས་དང་བསོད་ནམས་ཆེ་ཟེར་བ་ཤོར་བ་དང་། རོ་ལ་གཏམ་ཟེར་བྱ་ཁྲ་ཧུར་ཟེར་རོ་དེ་ཤོར་སོང་ངོ་། རྒྱལ་བུའི་བསམ་པ་ལ་བླ་མའི་ཞལ་ནས་རོ་ལ་གཏམ་ལན་མ་བྱེད་གསུངས་པ་ཡིན་ཏེ། སེམས་ཡེངས་པས་ལན། རོ་མེད་པར་ཕྱིན་ན་ཕན་མི་ཐོགས་བསམ། ཡང་དུར་ཁྲོད་དེར་ཕྱིན། རོ་ཧུ་ལུ་ཧུ་ལུ་ཟེར་བ་རྣམས་ལ་འགམས་ནས་ཕྱིན། རོ་ཧ་ལ་ཧ་ལ་ཟེར་བ་རྣམས་ཏོག་མས་རྡུང་གིན་ཕྱིན། །